മലയാളത്തിന് നിരവധി ഹിറ്റ് സിനിമകൾ സമ്മാനിച്ചൊരു സംവിധായകനാണ് ഭദ്രൻ. മോഹൻലാൽ, ഭദ്രൻ കൂട്ടുകെട്ടിൽ നിരവധി നല്ല സിനിമകൾ പുറത്തിറങ്ങിയിട്ടുണ്ട്. എന്നാലിപ്പോൾ മോഹൻലാൽ ആനപാപ്പാൻ ആകുന്നു എന്ന തരത്തിൽ മാധ്യമങ്ങളിൽ പ്രചരിക്കുന്ന വാർത്ത തെറ്റാണെന്ന് തുറന്നടിച്ചിരിക്കുകയാണ് ഭദ്രൻ.
സ്ഫടികത്തില്‍ മോഹന്‍ലാലിനെ ആനപ്പുറത്ത് കയറ്റിയിരുന്നു, അത് ആരാധകർ ഇരുകൈയ്യോടെ സ്വീകരിച്ചു. എന്നാൽ ഒരു തവണ കൂടി അങ്ങനെ ചെയ്യാൻ ഞാൻ തീരുമാനിച്ചിട്ടില്ല. ഇതൊക്കെ ആരുടെയോ ഒരു ഭാവന മാത്രമാണ്. ഒരു മാധ്യമത്തിന് നൽകിയ അഭിമുഖത്തിലാണ് ഭദ്രൻ ഇപ്രകാരം പറഞ്ഞത്.
മോഹന്‍ലാല്‍ ആനപാപ്പാനാകുന്ന ചിത്രത്തിന്‍റെ ഷൂട്ടിങ് അടുത്ത വര്‍ഷം ആരംഭിക്കും എന്ന തരത്തിലായിരുന്നു വാര്‍ത്തകള്‍ പ്രചരിക്കുന്നത്. ഇങ്ങനെയൊരു കഥയെപ്പറ്റി താൻ ആലോചിച്ചിട്ടുപോലുമില്ലെന്നാണ് ഭദ്രൻ പറയുന്നത്.
എന്നാല്‍ അടുത്ത വര്‍ഷം മോഹന്‍ലാലിനെ വച്ച് ഒരു സിനിമ ചെയ്യുന്നുണ്ടെന്നും ഭദ്രന്‍ വ്യക്തമാക്കി. ഏറ്റവും ഒടുവിൽ മോഹന്‍ലാലിനെ നായകനാക്കി ഭദ്രൻ ചെയ്ത സിനിമയായിരുന്നു ഉടയോൻ. സ്ഫടികം, ഒളിമ്പ്യന്‍ അന്തോണി ആദം, അങ്കിള്‍ ബണ്‍ എന്നിവയാണ് ഭദ്രൻ-മോഹൻലാൽ കൂട്ടുകെട്ടിൽ പിറന്ന മറ്റു സിനിമകൾ.
