സൽമാൻ ഖാനും റാണി മുഖർജിയും എക്കാലവും നല്ലൊരു സുഹൃദ് ബന്ധം നിലനിർത്തിയിട്ടുണ്ട്. ഇപ്പോഴിതാ ആ സൗഹൃദം സ്ക്രീനിലേക്കും കടക്കുന്നു. ക്രിസ്മസിനു റിലീസ് ചെയ്യുന്ന സൽമാൻ ചിത്രമായ ടൈഗർ സിന്ദാ ഹേയിൽ റാണി മുഖർജി ചിത്രം ഹിച്ച്ക്കിയുടെ ട്രെയ് ലറും ഉണ്ടാകും. ഫെബ്രുവരിയിലാണ് ഹിച്ച്ക്കി റിലീസ് ചെയ്യാൻ ഉദ്ദേശിച്ചിരിക്കുന്നത്.
മൂന്നു വർഷത്തിനു ശേഷം റാണി മുഖർജിയുടെ തിരിച്ചുവരവ് ചിത്രമാണ് ഹിച്ച്ക്കി. 2014 ൽ പുറത്തിറങ്ങിയ മർദ്ദാനിയാണ് റാണിയുടേതായി തിയറ്ററിലെത്തിയ അവസാന ചിത്രം. പ്രസവത്തിനായി സിനിമയിൽ നിന്ന് അവധിയെടുത്തിരിക്കുകയായിരുന്നു റാണി. സ്വന്തം കുറവുകളെ ശക്തിയാക്കി മാറ്റുന്ന ഒരു കഥാപാത്രത്തെയാണ് റാണി ഹിച്ച്ക്കിയിൽ അവതരിപ്പിക്കുന്നത്.
ടൈഗർ സിന്ദ ഹേയുടെ ചിത്രീകരണം ഏറെക്കുറെ പൂർത്തിയായിക്കഴിഞ്ഞു. ഏക് ദാ ടൈഗർ എന്ന സിനിമയുടെ രണ്ടാം ഭാഗമാണ് ടൈഗർ സിന്ദ ഹേ. അലി അബ്ബാസ് സഫർ സംവിധാനം ചെയ്യുന്ന ടൈഗർ സിന്ദാ ഹേയും സിദ്ധാർഥ് മൽഹോത്ര സംവിധാനം ചെയ്യുന്ന ഹിച്ച്ക്കിയും നിർമ്മിക്കുന്നതു യഷ് രാജ് ഫിലിംസാണ്.
