മലപ്പുറം: മലപ്പുറം അങ്ങാടിപ്പുറത്ത് എ.എം ഹോണ്ടാ ഷോറൂമില് തീപിടിത്തം. ഷോറൂമിലുണ്ടായിരുന്ന 18 വാഹനങ്ങള് കത്തി നശിച്ചു. കോടികളുടെ നഷ്ടമുണ്ടായതായാണ് വിലയിരുത്തല്. ഇന്ന് രാവിലെ ആറു മണിയോടെയാണ് തീപിടിത്തമുണ്ടായത്.
ഷോര്ട്ട് സര്ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക വിവരം. ഷോറൂമും അതിനൊപ്പം ചേര്ന്ന് പ്രവര്ത്തിക്കുന്ന സര്വീസ് സെന്ററും ഉള്പ്പെട്ട ഇരുനില കെട്ടിടത്തിലാണ് തീപിടിത്തമുണ്ടായത്.
സര്വീസിനായി കൊണ്ടുവന്ന 18 വാഹനങ്ങളാണ് പൂര്ണ്ണമായി കത്തി നശിച്ചത്. കൂടാതെ ഇരുപതിലധികം വാഹനങ്ങള് ഭാഗികമായും കത്തിയിട്ടുണ്ട്. മുകളിലെ നിലയിലായിരുന്നു പുതിയ വാഹനങ്ങള് ഉണ്ടായിരുന്നത്. തീ മുകളിലേക്ക് പടരുമ്പോഴേക്കും നാട്ടുകാരും അഗ്നിശമന സേനാംഗങ്ങളും ചേര്ന്ന് ഈ വാഹനങ്ങള് ഇവിടെനിന്ന് മാറ്റി. തീ പടര്ന്നത് അറിയാന് വൈകിയതാണ് അപകടത്തിന്റെ വ്യാപ്തി വര്ധിപ്പിക്കാനിടയാക്കിയത്. അഗ്നി ശമനസേനാ യൂണിറ്റുകള് ഒന്നര മണിക്കൂറോളമെടുത്താണ് തീ അണച്ചത്.