മുടന്തനായൊരു കുട്ടി പറഞ്ഞു
ഞാനെങ്ങനെ നൃത്തം ചെയ്യും?
നിന്റെ ഹൃദയം നടനമാടട്ടെയെന്ന്
ഞങ്ങൾ പറഞ്ഞു
പിന്നീടൊരു രോഗി പറഞ്ഞു
ഞാനെങ്ങനെ പാട്ട് പാടും ?
നിന്റെ ഹൃദയം പാടട്ടെയെന്ന്
ഞങ്ങൾ പറഞ്ഞു
പിന്നീടൊരു പാവം ഉണങ്ങിയ മുൾച്ചെടി പറഞ്ഞു
അപ്പോൾ, ഞാനെങ്ങനെ നൃത്തം ചെയ്യും?
നിന്റെ ഹൃദയം കാറ്റിൽ പറക്കട്ടെയെന്ന്
ഞങ്ങൾ പറഞ്ഞു
അപ്പോൾ, മുകളിൽ നിന്ന് ദൈവം പറഞ്ഞു
ഞാനെങ്ങനെയീ നീലിമയിൽനിന്ന് താഴേക്കിറങ്ങി വരും?
ഈ വെളിച്ചത്തിൽ വന്ന് ഞങ്ങൾക്ക് വേണ്ടി നൃത്തം ചെയ്യൂ
ഞങ്ങൾ പറഞ്ഞു
സൂര്യന് താഴെ എല്ലാവരുമൊത്തുചേർന്ന്
ഈ താഴ്വരയിൽ നൃത്തം ചെയ്യുമ്പോൾ
നമ്മോടൊത്തുചേരാത്ത അവന്റെ ഹൃദയം
വെറും മൺതരിയായി മണ്ണടിയുന്നു!
Note: നോബൽ പ്രൈസ് നേടിയ, ചിലെയിലെ ഏക വനിതയും (ലാറ്റിനമേരിക്കയിലെ ആദ്യത്തെ സ്ത്രീയും), പാബ്ലോ നെരൂദയുടെ അദ്ധ്യാപികയുമായ ഗബ്രിയേലാ മിസ്ട്രാൽ (Gabriela Mistral) 1889 ഏപ്രിൽ മാസത്തിൽ ജനിച്ചു, 1957 ജനുവരിയിൽ നിര്യാതയായി. ഗബ്രിയേലാ മിസ്ട്രാൽ ഒരു പോയറ്റ്-ഡിപ്ലോമാറ്റും, ഹ്യൂമാനിറ്റേറിയനും ആയിരുന്നു. അവരുടെ കവിതകളിൽ മാതൃത്വം, ദയ, കുഞ്ഞുങ്ങൾ, പ്രകൃതി, ആത്മീയത എന്നിവ നിറഞ്ഞു നിൽക്കുന്നത് കാണാം.
