കൊച്ചി: പാര്‍ട്ടി നേതാക്കള്‍ക്കും പ്രവര്‍ത്തകര്‍ക്കും ക്രിമിനല്‍ സംഘങ്ങളുമായി ഒരു ബന്ധവും പാടില്ലെന്ന് മുഖ്യമന്ത്രി പിണറായി വിജയന്‍. അത്തരക്കാര്‍ ഒരു കാരണവശാലും പാര്‍ട്ടിയിലേക്ക് വരാന്‍ പാടില്ല. അവര്‍ക്കെതിരെ മുഖം നോക്കാതെ നടപടിയെടുക്കണമെന്നും മുഖ്യമന്ത്രി പറഞ്ഞു. സിപിഐഎം എറണാകുളം ജില്ലാസമ്മേളനത്തിന്റെ പൊതുചര്‍ച്ചയിലാണ് മുഖ്യമന്ത്രി ഇക്കാര്യം പറഞ്ഞത്.
കളമശേരി ഏരിയസെക്രട്ടറി വി.എ.സക്കീര്‍ ഹുസൈനെ പൊലീസ് കള്ളക്കേസില്‍ കുടുക്കിയെന്ന് പൊതുചര്‍ച്ചയില്‍ നേരത്തെ വിമര്‍ശനമുയിരുന്നു.
ടൗണ്‍ഹാളില്‍ നടക്കുന്ന ജില്ലാ സമ്മേളനം വൈകുന്നേരം മറൈന്‍ഡ്രൈവിലെ പൊതുസമ്മേളനത്തോടെ സമാപിക്കും. മുഖ്യമന്ത്രിയാണ് പൊതുസമ്മേളനത്തിന്റെ ഉദ്ഘാടകന്‍. പുതിയ ജില്ലാ കമ്മിറ്റിയെ ഇന്നു തെരഞ്ഞെടുക്കും. പി.രാജീവ് ജില്ലാ സെക്രട്ടറിയായി തുടരനാണ് സാധ്യത. എന്നാല്‍ ജില്ലാ കമ്മിറ്റിയില്‍ കാര്യമായ അഴിച്ചുപണി ഉണ്ടായേക്കും.
