കൊച്ചിയില് നടിയെ ആക്രമിച്ച കേസില് നടന് ദിലീപിനെ ഭീഷണിപ്പെടുത്താന് പള്സര് സുനി സഹതടവുകാരനായ വിഷ്ണുവിന് വാഗ്ദാനം ചെയ്തത് രണ്ട് ലക്ഷം രൂപ. ദിലീപിന് ഭീഷണി കത്ത് നല്കുന്നതിനും ഫോണ് ചെയ്യുന്നതിനുമുള്ള കൂലിയായാണ് വാഗ്ദാനം. പൊലീസിന്റെ ചോദ്യം ചെയ്യലിലാണ് വിഷ്ണു ഇക്കാര്യങ്ങള് വെളിപ്പെടുത്തിയത്. പിടിക്കപ്പെടുമെന്നായപ്പോള് വിഷ്ണു കത്ത് പൊലീസിന് കൈമാറി. വിഷ്ണുവിനെ പൊലീസ് നേരത്തെ കസ്റ്റഡിയിലെടുത്തിരുന്നു. ഇയാളുടെ സുഹൃത്തായ മനീഷും കസ്റ്റഡിയിലായിട്ടുണ്ട്. സംവിധായകന് നാദിര്ഷയെ വിളിച്ച് പണം ആവശ്യപ്പെട്ടതും വിവാദ കത്ത് കൈമാറിയതും വിഷ്ണു ആയിരുന്നു.
വിവാദങ്ങള് കൊടുമ്പിരികൊള്ളുമ്പോള് തന്നെ തട്ടിക്കൊണ്ടു പോയി ആക്രമിക്കപ്പെട്ട നടിക്കെതിരെ മോശം പരാമര്ശം നടത്തിയവര്ക്കെതിരേയെല്ലാം കേസെടുക്കാന് സാധ്യതയെന്നാണ് പുതിയ റിപ്പോര്ട്ടുകള് . നടിയെ അപകീര്ത്തിപ്പെടുത്തുന്ന തരത്തില് പലരും പ്രസ്താവനകള് ഇറക്കിയിരുന്നു. ഇവര്ക്കെതിരേയാണ് കേസ് രജിസ്റ്റര് ചെയ്യാന് സാധ്യത. ചൊവ്വാഴ്ച നടി തന്നെ പ്രതികരണവുമായി രംഗത്തുവന്നിരുന്നു.
തനിക്കെതിരെ മോശം പരാമര്ശം നടത്തുന്നവര്ക്കെതിരെ വേണ്ടിവന്നാല് നിയമനടപടി സ്വീകരിക്കുമെന്നും അവര് പ്രസ്താവനയിടെ വ്യക്തമാക്കിയിരുന്നു. ഇനി നടി കേസ് കൊടുത്തില്ലെങ്കിലും പോലീസ് തന്നെ സ്വമേധായ കേസ് രജിസ്റ്റര് ചെയ്യാനുള്ള സാധ്യതയും കൂടുതലാണ്. പീഡനക്കേസിലെ ഇരയ്ക്കെതിരെ പരസ്യമായി പരാമര്ശം നടത്തരുതെന്ന നിയമം നിലവിലുള്ളതിനാല് കേസെടുക്കാനുള്ള സാധ്യത കൂടുതലാണ്.