ന്യൂഡൽഹി: കേരളത്തില് അടക്കം ഭരണം കിട്ടുംവരെ പ്രവര്ത്തകര്ക്ക് വിശ്രമിക്കാന് അവകാശമില്ലെന്ന് ബിജെപി അധ്യക്ഷന് അമിത് ഷാ. പാർട്ടിയുടെ സുവർണകാലം വരാനിരിക്കുന്നതേയുള്ളൂ. വടക്കു കിഴക്കൻ സംസ്ഥാനങ്ങളിലുണ്ടായ വൻ വിജയംകൊണ്ട് സംതൃപ്തരാകരുതെന്നും കൂടുതൽ പ്രവർത്തനങ്ങളിലേക്ക് ഇറങ്ങണമെന്നും അമിത് ഷാ പറഞ്ഞു.
പശ്ചിമ ബംഗാൾ, കേരളം, ഒഡിഷ സംസ്ഥാനങ്ങളിൽ അധികാരം പിടിക്കാത്തിടത്തോളം പാർട്ടിയുടെ സുവർണകാലം പിറക്കുന്നില്ല. കേന്ദ്ര മന്ത്രി വിജയ് ഗോയലിന്റെ വസതിയിൽ പാർട്ടി നേതാക്കളുടെ സാന്നിധ്യത്തിൽ ചേർന്ന ചടങ്ങിൽ സംസാരിക്കുകയായിരുന്നു അദ്ദേഹം. രാജ്യത്തെ എല്ലാ ബൂത്തുകളിലും പ്രവർത്തകർ, എല്ലാ പഞ്ചായത്തുകളിലും പ്രാതിനിധ്യം എന്ന ലക്ഷ്യം കൈവരിക്കണം.
പാർട്ടിയുടെ സുവർണകാലം തുടങ്ങിയതായി ചില പ്രവർത്തകർ പറയുന്നു. ഒരു കാര്യം ഞാൻ വ്യക്തമാക്കട്ടെ. ഇതല്ല സുവർണ യുഗം. ഇപ്പോഴും കേരളം, കർണാടക ഉൾപ്പെടെയുള്ള സംസ്ഥാനങ്ങളിൽ ബിജെപിക്ക് അധികാരം ലഭിച്ചിട്ടില്ല. ഇൗ സംസ്ഥാനങ്ങളിൽ ഭരണം കിട്ടും വരെ പ്രവർത്തകർക്ക് വിശ്രമിക്കാൻ അവകാശമില്ല -അദ്ദേഹം പറഞ്ഞു. ത്രിപുരയിലും മേഘാലയയിലും നാഗാലാൻഡിലും സഖ്യകക്ഷികളുമായി ചേർന്ന് ബിജെപി സർക്കാർ രൂപവത്കരിക്കുമെന്നും അദ്ദേഹം പറഞ്ഞു