– സുജിത് .എസ്-
കുവൈറ്റ് സിറ്റി : നായര്‍ സര്‍വ്വീസ് സൊസൈറ്റി കുവൈറ്റ് സൗജന്യ മെഡിക്കല്‍ ക്യാമ്പ് സംഘടിപ്പിച്ചു. ഇന്ത്യന്‍ ഡോക്ടേഴ്‌സ് ഫോറവും കുവൈറ്റ് ഹാര്‍ട്ട് ഫൗണ്ടേഷനും ഇന്ത്യന്‍ ഡെന്റല്‍ അസോസിയേഷനും സംയുക്തമായാണ് വൈദ്യ പരിശോധന നടത്തിയത്.
അബ്ബാസിയ യുണൈറ്റഡ് ഇന്ത്യന്‍ സ്‌കൂളില്‍ സംഘടിപ്പിച്ച ക്യാമ്പിന്റെ ഉദ്ഘാടനം ഐ.ഡി.എഫ് സെക്രട്ടറി ഡോ.സെയ്ദ് റഹ്മാന്‍ നിര്‍വ്വഹിച്ചു. ഇന്ത്യന്‍ ഡെന്റല്‍ അസോസിയേഷന്‍ ഡയറക്ടര്‍ ഡോ. പ്രതാപ് ഉണ്ണിത്താന്‍, എന്‍.എസ്.എസ്. വൈസ് പ്രസഡന്റ് മധു വെട്ടിയാര്‍, വനിതാസമാജം കണ്‍വീനര്‍ ദീപ പിള്ള, എന്‍.എസ്.എസ്. രക്ഷാധികാരി സുനില്‍മേനോന്‍, ചാരിറ്റി കോര്‍ഡിനേറ്റര്‍ സജികുമാര്‍, ജോ.ചാരിറ്റി കോര്‍ഡിനേറ്റര്‍ മാധവ്ചന്ദ്രന്‍ തുടങ്ങിയവര്‍ സംസാരിച്ചു. മെഡിക്കല്‍ ക്യാമ്പിന്റെ പ്രധാന സ്‌പോണ്‍സര്‍ ലുലു എക്‌സ്‌ചേഞ്ച് ഏരിയാ മാനേജര്‍ ഷഫാസ് അഹമ്മദ് ആശംസകള്‍ അര്‍പ്പിച്ചു. എന്‍.എസ്.എസ്. മെഡിക്കല്‍ ക്യാമ്പ് കമ്മിറ്റി കണ്‍വീനര്‍ അനീഷ് പി നായര്‍, ബൈജു പിള്ള, വിജയകുമാര്‍ എന്നിവര്‍ ചടങ്ങുകള്‍ക്ക് നേതൃത്വം നല്‍കി.
എന്‍.എസ്.എസ്. കുവൈറ്റ് 2017 കലണ്ടര്‍ പ്രകാശനം പ്രസിദ്ധ ഗൈനക്കോളജിസ്റ്റ് ഡോ. സരിതയില്‍ നിന്നും ഷിഫ അല്‍ജസീറ മെഡിക്കല്‍ സെന്റര്‍ ജനറല്‍ മാനേജര്‍ റിസ്വാന്‍ ഏറ്റുവാങ്ങി പ്രകാശനം ചെയ്തു. ക്യാമ്പില്‍ പങ്കെടുത്ത ഡോക്ടേഴ്‌സിനും നഴ്‌സുമാര്‍ക്കും ചടങ്ങില്‍ മെമന്റോ കൈമാറി. ജനറല്‍ സെക്രട്ടറി പ്രസാദ് പത്മനാഭന്‍ സ്വാഗതവും ട്രഷറര്‍ ശ്രീകുമാര്‍ നന്ദിയും അറിയിച്ചു.
