ന്യൂഡല്ഹി: സുനന്ദ പുഷ്കറിന്റെ മരണവുമായി ബന്ധപ്പെട്ട കേസില് ശശി തരൂരിനെ കോടതി കുറ്റവിമുക്തനാക്കി. ഡല്ഹി റോസ് അവന്യൂ കോടതിയുടേതാണ് വിധി.കുറ്റംചുമത്താനുള്ള തെളിവുകൾ ശശി തരൂരിനെതിരെയില്ലെന്ന് ചൂണ്ടിക്കാട്ടിയാണ് കോടതി അദ്ദേഹത്തെ കുറ്റവിമുക്തനാക്കിയത്.സുനന്ദ പുഷ്കറിന് നിരവധി അസുഖങ്ങളുണ്ടായിരുന്നെന്നും മരണം സ്വാഭാവികമാണെന്നുമായിരുന്നു ശശി തരൂരിന്റെ വാദം.പോസ്റ്റുമോര്ട്ടം റിപ്പോര്ട്ടുകളും മറ്റ് മെഡിക്കല് റിപ്പോര്ട്ടുകളും സുനന്ദയുടെ മരണം ആത്മഹത്യയോ കൊലപാതകമോ അല്ലെന്നാണ് സൂചിപ്പിക്കുന്നത്. വര്ഷങ്ങളായി അന്വേഷിച്ചിട്ടും മരണകാരണം കണ്ടെത്താന് പ്രോസിക്യൂഷന് സാധിച്ചിട്ടില്ല. സുനന്ദയുടേത് ആകസ്മിക മരണമായി കണക്കാക്കണമെന്നും തരൂർ വാദിച്ചു.2014 ജനുവരി 17നാണ് ഡല്ഹിയിലെ ആഡംബര ഹോട്ടലില് ഭാര്യ സുനന്ദയെ മരിച്ചനിലയില് കണ്ടെത്തിയത്. സുനന്ദയുടെ മരണത്തില് ശശി തരൂരിന് പങ്കുണ്ടെന്ന് ആരോപണം വലിയ വിവാദങ്ങൾക്ക് കാരണമായിരുന്നു. ആദ്യം കൊലപാതമാണെന്ന് അവകാശപ്പെട്ടെങ്കിലും തെളിവുകള് കണ്ടെത്താന് പൊലീസിനായില്ല. ഒടുവില് ആത്മഹത്യപ്രേരണക്കുറ്റം ചേര്ത്ത് 2018 മേയ് 15ന് കുറ്റപത്രം സമര്പ്പിക്കുകയായിരുന്നു. ഐ പി സി 306 ആത്മഹത്യ പ്രേരണ, 498എ ഗാര്ഹിക പീഡനം എന്നീകുറ്റങ്ങളാണ് ശശി തരൂറിനെതിരെ കുറ്റപത്രത്തില് ചേര്ത്തിരുന്നത്. ആത്മഹത്യപ്രേരണക്കുറ്റവും ഗാർഹിക പീഡനവും തരൂരിനെതിരെ ചുമത്താമെന്നായിരുന്നു പ്രോസിക്യൂഷൻ വാദം. ഈ വാദം തള്ളിക്കൊണ്ടാണ് കോടതിയിൽ നിന്നും നിർണായക വിധിയുണ്ടായിരിക്കുന്നത്.