ചിക്കാഗോ: 2018 ജൂൺ 21 മുതൽ 24 വരെ ചിക്കാഗോ നഗരത്തെ അക്ഷരാർത്ഥത്തിൽ കൊച്ചു കേരളമാക്കാൻ പോകുന്ന ഫോമാ (ഫെഡറേഷൻ ഓഫ് മലയാളി അസ്സോസിയേഷൻസ് ഓഫ് അമേരിക്കാസ്) അന്താരാഷ്ട്ര കൺവൻഷന്റെ കൾച്ചറൽ പ്രോഗ്രാമിന്റെ ചെയർമാനായി, ഫിലാഡൽഫിയയിലെ വിവിധ സാമൂഹിക-സാംസ്ക്കാരിക സംഘടനകളിൽ തന്റെതായ വ്യക്തി മുദ്ര പതിപ്പിച്ച ബെന്നി കൊട്ടാരത്തെ തിരഞ്ഞെടുത്തു.
മമ്മൂട്ടി, മോഹൻലാൽ തുടങ്ങിയ പ്രമുഖ സൂപ്പർ സ്റ്റാറുകളുടെ സ്റ്റേജ് ഷോകൾ ഒറ്റയ്ക്ക് എടുത്തു നടത്തി വിജയിപ്പിച്ച അമേരിക്കയിലെ വളരെ ചുരുക്കം വ്യക്തികളിലൊരാളാണ് ബെന്നി.
ഫിലാഡൽഫിയയിലെ കോട്ടയം അസ്സോസിയേഷൻ, എക്യുമിനിക്കൽ പ്രസ്ഥാനത്തിന്റെ പ്രോഗ്രാം കോർഡിനേറ്റർ തുടങ്ങി വിവിധ സംഘടനാ പ്രവർത്തനങ്ങളിലും അദ്ദേഹം പ്രവർത്തിച്ചു വരുന്നു.
ഫോമാ അന്താരാഷ്ട്ര കൺവൻഷനിൽ വച്ച് നടക്കുന്ന കൾച്ചറൽ കോമ്പറ്റീഷനിൽ പങ്കെടുക്കുന്ന വിവിധ റീജണൽ ടീമുകൾക്ക് വിവിധ പരിപാടികൾ ചേർത്തണക്കി അവതരിപ്പിക്കാൻ 20 മിനിട്ടുകൾ നൽകും. ഈ 20 മിനിട്ടിനുള്ളിൽ സംഗീതം, സ്കിറ്റ്, സംഘഗാനം, സിനിമാറ്റിക്ക് ഡാൻസ്, ശാസ്ത്രീയ നൃത്തം, നാടോടി നൃത്തം തുടങ്ങി ഏത് ഇന്ത്യൻ കലാ പരിപാടികളും അവതരിപ്പിക്കാൻ അവസരം ഉണ്ടാകും. ചില റീജിയനുകളിൽ നിന്നും ഒന്നിൽ കൂടുതൽ ടീമുകളുണ്ടാകും.
വിത്യസ്തങ്ങളായ വിവിധ പരിപാടികൾ ഉൾപ്പെടുത്തി കൊണ്ട് നടത്തപ്പെടുന്ന ഫോമാ 2018 ഫാമിലി കൺവൻഷന്റെ ആദ്യ ഘട്ട രജിസ്ട്രേഷൻ പൂർത്തിയാകുമ്പോൾ, മുന്നൂറോളം ഫാമിലികളാണ് ഇതു വരെ രജിസ്റ്റർ ചെയ്തിരിക്കുന്നത്. കേരളത്തിന്റെ സംസ്ക്കാരവും ഭാഷയും പരിചയപ്പെടുന്നതിനൊപ്പം, കേരളീയ ഭക്ഷണവും ഉൾപ്പെടുത്തി കൊണ്ടാണ് ഈ നോർത്ത് അമേരിക്കൻ മലയാളി മഹാമഹം കൊടിയേറുന്നത്.
പുതു തലമുറയ്ക്ക് കേരളീയ സംസ്ക്കാരം പരിചയപ്പെടുത്താനും, പഴയ തലമുറയ്ക്കൊപ്പം യുവ ജനതയുടെ ഒരു നാഷണൽ നെറ്റ് വർക്കും ഉണ്ടാക്കാനാകും എന്നത് ഫോമ പോലുള്ള ദേശീയ സംഘടനകളുടെ പിന്നിലെ ഉദ്ദേശ ശുദ്ധി.
കൺവൻഷനെ കുറിച്ച് അറിയുവാനും, രജിസ്റ്റർ ചെയ്യുവാനും സന്ദർശിക്കുകwww.fomaa.net
