“ചങ്ങമ്പുഴ പാർക്ക് ” ഷോർട്ട്ഫിലിം  റിലീസ് ചെയ്തു ; അമേരിക്കയിലും ,യു.കെയിലും ആമസോൺ പ്രൈമിൽ  കാണാം

പ്രശസ്ത എഴുത്തുകാരനായ സേതു എഴുതിയ “ചങ്ങമ്പുഴ പാർക്ക്” എന്ന ചെറുകഥയെ ആസ്പദമാക്കി അമേരിക്കൻ മലയാളിയായ വിനോദ് മേനോൻ ,സാൻഫ്രാൻസിസ്കോ  സർഗ്ഗ വേദിയുടെ ബാനറിൽ തിരക്കഥ എഴുതി സംവിധാനം ചെയ്ത “ചങ്ങമ്പുഴ പാർക്ക്”എന്ന ഷോർട്ട്ഫിലിം കേരളപ്പിറവി ദിനത്തിൽ ആമസോൺ പ്രൈമിൽ അമേരിക്കയിലും യു.കെയിലും റിലീസ് ചെയ്തു  .മക്കൾ വിദൂര സ്ഥലങ്ങളിൽ ആയ  വിഭാര്യനായ  ഒരു വൃദ്ധന്റെ  ആകുലതകൾ  അവതരിപ്പിക്കുന്ന  കഥയാണ്  ചങ്ങമ്പുഴ പാർക്ക്  .

വിരമിച്ച മലയാള അദ്ധ്യാപകനും വിഭാര്യനുമായ നാരായണകുട്ടി മാഷ് അമേരിക്കയിലെ മകളെയും കുടുംബത്തെയും സന്ദർശിക്കുന്നു , അദ്ദേഹത്തിന്റെ താമസം സുഖകരവും വിശ്രമവുമാക്കാൻ കുടുംബം പരമാവധി ശ്രമിക്കുന്നു. എന്നിരുന്നാലും, അദ്ദേഹത്തിന്റെ മനസിന്റെ കോണിൽ  ഇപ്പോഴും താൻ വൈകുന്നേരങ്ങൾ ചിലവഴിക്കാറുള്ള  ചങ്ങമ്പുഴ പാർക്ക് മാത്രം . അദ്ദേഹത്തിന്റെ  നൊസ്റ്റാൾജിയയും, വൈകുന്നേരവും , മുതിർന്ന പൗരന്മാർ ഒത്തുചേരുന്ന ഇടങ്ങളും നിറഞ്ഞു നിൽക്കുന്നു .കേരളത്തിലെ പഴയ ജീവിതത്തിലേക്ക് മടങ്ങിവരാനുള്ള ആഗ്രഹത്തോടൊപ്പം  മകളോടും മരുമകനോടും ചെറുമകളോടും  ഉള്ള സ്നേഹം തുലനം ചെയ്യാൻ അദ്ദേഹം ശ്രമിക്കുന്നു.

നടനും എഴുത്തുകാരനുമായ തമ്പി ആന്റണിയാണ് നാരായണൻകുട്ടിമാഷ് എന്ന കഥാപാത്രത്തെ അവതരിപ്പിക്കുന്നത് .സുഹൃത്തായ ദേവസ്യ മാഷായി ടി ജി രവിയും വേഷമിടുമ്പോൾ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത് അമേരിക്കൻ മലയാളികൾ ആണ് .
.ഷെമി  ദീപക്, ശ്യാം ചന്ദ്, ആൻ മേരി ആൻ്റണി, രഘുനാഥൻ കടങ്ങോട് തുടങ്ങിയവരാണ് മറ്റ് അഭിനേതാക്കൾ. സിലിക്കൺ വാലി  ഐ ടി രംഗത്ത് പ്രവർത്തിക്കുന്നവരുടെ കൂട്ടായ പരിശ്രമം കൂടിയാണ് ഈ ഷോർട്ട്ഫിലിം

സഹ സംവിധാനം -ടോം ആന്റണി, ജന ശ്രീനിവാസൻ , ഛായാഗ്രഹണം – മനോജ് ജയദേവൻ, ജോജൻ ആന്റണി  .ഗാനരചന – സിന്ധു നായർ (ബോസ്റ്റൺ) ,സംഗീതവും ആലാപനവും -ജയ് നായർ, എഡിറ്റിംഗ് ,കളറിംഗ് – മനോജ് ജയദേവൻ ,പശ്ചാത്തല സംഗീതം – ജയ് നായർ, ലോയിഡ് ജോർജ്, മെൽവിൻ ജെറോൾഡ്, ജിതേഷ് രാജൻ, രൂപേഷ് കർത്ത,ശ്രീ നായർ  ,പ്രൊഡക്ഷൻ കോ-ഓർഡിനേറ്റർ -രാജി മേനോൻ ,സ്റ്റിൽസ് – ജോജൻ ആന്റണി .

ചങ്ങമ്പുഴ പാർക്ക് കാഴ്ചക്കാരുടെയിടയിലേക്ക് എത്തുമ്പോൾ കഥാകൃത്ത് സേതു മുതൽ എല്ലാ അഭിനേതാക്കളുടേയും സാങ്കേതിക പ്രവർത്തകരുടേയും പിന്തുണ ഈ ഷോർട് ഫിലിം പൂർത്തിയാക്കാൻ ഏറെ സഹായിച്ചു. തുടക്കം മുതൽ റിലീസിന് തയറാകുന്നതു വരെ ഈ സംരംഭത്തിനൊപ്പം ഉണ്ടായിരുന്ന  ടോം ആന്റണിക്ക് പ്രത്യേകം നന്ദി അറിയിക്കുന്നതായും സംവിധായകൻ വിനോദ് മേനോൻ അറിയിച്ചു.

സാൻഫ്രാൻസിസ്കോയിലെ കലാ സാംസ്കാരിക രംഗത്തെ സജീവ സാന്നിധ്യമായ സർഗ്ഗവേദിയുടെ പ്രഥമ സിനിമ സംരംഭമാണ് ചങ്ങമ്പുഴപാർക്ക്. സർഗവേദി കഴിഞ്ഞ വർഷങ്ങളിൽ  അവതരിപ്പിച്ച പെരുന്തച്ചൻ ,കാട്ടുകുതിര ,സ്വാതി തിരുന്നാൾ ( പുണ്യം സംഘടനയുമായി ചേർന്ന് അവതരിപ്പിച്ചത് ) എന്ന നാടകങ്ങൾ വളരെ ശ്രദ്ധപിടിച്ചു പറ്റിയിരുന്നു .

പ്രായമേറുന്തോറും  ഉളവാകുന്ന നഷ്ടബോധവും അരക്ഷിതത്വവും   മറികടക്കാനായി ഉരുത്തിരിയുന്ന  സായന്തന കൂട്ടുകെട്ട് നല്കുന്ന ആശ്വാസം ചില്ലറയല്ല .മകളുടെ കുടുംബവുമായി യു എസ്സിലെ വീട്ടിലും കഴിച്ചു കൂട്ടുമ്പോഴും ചങ്ങമ്പുഴ പാർക്കിലെത്താൻ കൊതിക്കുന്ന  വൃദ്ധ മനസിന്റെ കഥ ലോകത്തുള്ള എല്ലാ മലയാളികളുടെയും മനസിന്‌ നൊമ്പരമുണ്ടാക്കും .
ഈ ഷോർട്ട് ഫിലിം കാണുകയും അഭിപ്രായങ്ങൾ അറിയിക്കുകയും  പ്രോത്സാഹിപ്പിക്കുകയൂം ചെയ്യണമെന്നും സർഗവേദി പ്രവർത്തകർ അഭ്യർത്ഥിച്ചു .

ചങ്ങമ്പുഴ പാർക്ക്
ഈ ലിങ്കിൽ കാണാം

നിങ്ങളുടെ അഭിപ്രായങ്ങള്‍ രേഖപ്പെടുത്തൂ