തിരുവനന്തപുരം: പിണറായി വിജയന്റെ നേതൃത്വത്തിലുള്ള രണ്ടാംസര്ക്കാര് സത്യപ്രതിജ്ഞ ചെയ്ത് അധികാരമേറ്റു. കേരളത്തിലാദ്യമായി ഒരു മുന്നണിക്കു നല്കിയ ഭരണത്തുടര്ച്ചയുടെ ചരിത്ര മുഹൂര്ത്തമായിരുന്നു അത്. 21 മന്ത്രിമാരാണ് മുഖ്യമന്ത്രി പിണറായി വിജയനോടൊപ്പം സത്യപ്രതിജ്ഞ ചെയ്ത് അധികാരമേറ്റത്. തിരുവനന്തപുരം സെന്ട്രല് സ്റ്റേഡിയത്തിലായിരുന്നു ചടങ്ങുകള് അരങ്ങേറിയത്.ഗവര്ണര് ആരിഫ് മുഹമ്മദ് ഖാന്റെ മുമ്പാകെയാണ് സത്യപ്രതിജ്ഞ ചെയ്ത് അധികാരമേറ്റത്.
മുഖ്യമന്ത്രിക്കു ശേഷം രണ്ടാമതായി ഘടകകക്ഷിയായ സിപിഐയുടെ പ്രതിനിധി കെ രാജന് സത്യപ്രതിജ്ഞ ചെയ്തു. മൂന്നാമതായി കേരള കോണ്ഗ്രസ് എം പ്രതിനിധി റോഷി അഗസ്റ്റിന് സത്യപ്രതിജ്ഞ ചെയ്ത് അധികാരമേറ്റു. നാലാമതായി ജനതാദള് എസ് പ്രതിനിധി കെ കൃഷ്ണന്കുട്ടിയും അഞ്ചാമതായി എന്സിപിയുടെ എ കെ ശശീന്ദ്രന്നും സത്യപ്രതിജ്ഞ ചെയ്തു.
തുടര്ന്ന് ഐ എന് എല് പ്രതിനിധി അഹമ്മദ് ദേവര്കോവില് സത്യപ്രതിജ്ഞ ചെയ്തു. ഏഴാമനായി ആന്റണി രാജു. ജനാധിപത്യ കേരള കോണ്ഗ്രസ് പ്രതിനിധി ആന്റണി രാജു സത്യപ്രതിജ്ഞ ചെയ്ത് മന്ത്രിയായി അധികാരമേറ്റു ഇടതു സ്വതന്ത്രനായി വിജയിച്ച വി അബ്ദു റഹ്മാന് സത്യപ്രതിജ്ഞ ചെയ്ത് അധികാരമേറ്റു
തുടര്ന്ന് മന്ത്രിസഭാ അംഗങ്ങള് അക്ഷരമാലാ ക്രമത്തില് സത്യപ്രതിജ്ഞ ചെയ്ത് അധികാരമേററു. ജി ആര് അനില്, കെ എന്. ബാലഗോപാല്, പ്രൊഫ. ആര് ബിന്ദു. ജെ ചിഞ്ചു റാണി, എം വി ഗോവിന്ദന്, മുഹമ്മദ് റിയാസ്, പി പ്രസാദ്, കെ രാധാകൃഷ്ണന് , സജി ചെറിയാന്, വി ശിവന്കുട്ടി, വി എന് വാസവന്, വീണ ജോര്ജ്ജ് എന്നിവര് സത്യപ്രതിജ്ഞ ചെയ്ത് അധികാരമേററു.
സത്യപ്രതിജ്ഞയ്ക്ക് മുന്നോടിയായി സംഗീതാവിഷ്കാരം അരങ്ങേറി. പിണറായിയുടെ രണ്ടാമൂഴം പ്രമേയമാക്കി 54 ഗായകരും സംഗീതജ്ഞരും അണിചേര്ന്ന നവകേരള ഗീതാഞ്ജലി സെന്ട്രല് സ്റ്റേഡിയത്തിലെ സ്ക്രീനില് വെര്ച്വലായി അവതരിപ്പിച്ചു.
ഡോ. കെ.ജെ. യേശുദാസ്, എ.ആര്. റഹ്മാന്, ഹരിഹരന്, പി.ജയചന്ദ്രന്, കെ.എസ്. ചിത്ര, സുജാത, എം.ജി ശ്രീകുമാര്, ശങ്കര് മഹാദേവന്, അംജത് അലിഖാന്, ഉമയാള്പുരം ശിവരാമന്, ശിവമണി, മോഹന്ലാല്, ജയറാം, കരുണാമൂര്ത്തി, സ്റ്റീഫന് ദേവസ്യ, ഉണ്ണിമേനോന്, ശ്രീനിവാസ്, ഉണ്ണികൃഷ്ണന്, വിജയ് യേശുദാസ്, മധുബാലകൃഷ്ണന്, ശ്വേതാമോഹന്, ഔസേപ്പച്ചന്, എം. ജയചന്ദ്രന്, ശരത്, ബിജിബാല്, രമ്യാനമ്പീശന്, മഞ്ജരി, സുധീപ്കുമാര്, നജിം അര്ഷാദ്, ഹരിചരന്, മധുശ്രീ, രാജശ്രീ, കല്ലറ ഗോപന്, അപര്ണ രാജീവ്, വൈക്കം വിജയലക്ഷ്മി, സിതാര, ഹരികൃഷ്ണന്, രഞ്ജിനി ജോസ് ,പി കെ മേദിനി ,മുരുകന് കാട്ടാക്കട എന്നിവരടക്കം ചലച്ചിത്രരംഗത്തെ പ്രമുഖരാണ് തുടര്ഭരണത്തിന് സംഗീതത്തിലൂടെ ഭാവുകമേകിയത്. അവതരണം നടത്തിയത് മമ്മൂട്ടിയാണ്.
ഇ.എം.എസ് മുതല് പിണറായിവരെയുള്ളവര് നയിച്ച സര്ക്കാരുകള് എങ്ങനെ കേരളത്തെ മാറ്റുകയും വളര്ത്തുകയും ചെയ്തു എന്ന് വിളംബരം ചെയ്യുന്നതായിരുന്നു ഈ സംഗീത ആല്ബം. ഇത്രയധികം ഗായകരും സംഗീതജ്ഞരും പങ്കാളികളാകുന്ന ഒരു സംഗീത ആല്ബം മലയാളത്തില് ആദ്യത്തേതാണ്. പ്രസിദ്ധ ചലച്ചിത്ര സംവിധായകന് ടി.കെ. രാജീവ്കുമാറാണ് ആശയാവിഷ്കാരം നിര്വഹിച്ചത്. രമേശ് നാരായണന് സംഗീതം ചിട്ടപ്പെടുത്തി. ആര് എസ് ബാബു ആണ് പ്രോജക്ട് കോഡിനേറ്റര്. മണ്മറഞ്ഞ കവികളുടേതിന് പുറമെ പ്രഭാവര്മ്മ, റഫീഖ് അഹമ്മദ് എന്നിവരുടെ വരികളും ഉപയോഗിച്ചു.