തോമാശ്ലീഹാ ഇന്ത്യയില് വന്നിട്ടില്ലെന്ന് പറഞ്ഞിട്ടില്ലെന്ന് സീറോ മലബാര് സഭയുടെ മുന് വക്താവ് ഫാദര് പോള് തേലക്കാട്ട്. ജീവിക്കുന്ന വിശ്വാസവും പാരമ്പര്യവും ഉണ്ട്, അത് അനുസരിച്ചാണ് കാര്യങ്ങള് പോകേണ്ടതെന്നും പോള് തേലക്കാട്ട് പറഞ്ഞു.
തോമാശ്ലീഹാ ഇന്ത്യയില് വന്നതിന് തെളിവില്ലെന്ന നിലപാട് വസ്തുതാ വിരുദ്ധമെന്ന് സീറോ മലബാര് സഭ വ്യക്തമാക്കിയിരുന്നു. തോമാശ്ലീഹാ ഇന്ത്യയില് വന്നിട്ടുണ്ട്. ചരിത്ര രേഖകള് ഇത് തെളിയിക്കുന്നുവെന്നും സീറോ മലബാര് സഭ വ്യക്തമാക്കിയിരുന്നു. സീറോ മലബാര് സഭയുടെ ഉത്ഭവം തോമാശ്ലീഹായുടെ സുവിശേഷ പ്രഘോഷണത്തില് നിന്നുമാണ്. വിയോജിക്കുന്നവര് ന്യൂനപക്ഷം മാത്രമെന്നും കൂരിയ ബിഷപ് മാര് വാണിയപ്പുരയ്ക്കല് പറഞ്ഞിരുന്നു. തേലക്കാട്ടിന്റെ പരാമര്ശത്തിനുള്ള മറുപടിയിരുന്നു ഇത്. എന്നാല് തോമാശ്ലീഹാ ഇന്ത്യയില് വന്നിട്ടില്ലെന്ന് താന് പറഞ്ഞിട്ടില്ലെന്നാണ് ഫാ. തേലക്കാട്ട് ഇപ്പോള് വ്യക്തമാക്കുന്നത്.
ചില ചരിത്രകാരന്മാരും ക്രൈസ്തവ സഭകളും പ്രചരിപ്പിക്കുന്നതുപോലെ തോമാശ്ലീഹ കേരളത്തില് വന്നിട്ടില്ലെന്ന് സീറോ മലബാര് സഭയുടെ മുന് വക്താവ് ഫാദര് പോള് തേലക്കാട്ട് പറഞ്ഞിരുന്നു എന്നായിരുന്നു വാര്ത്തകള്. ക്രൈസ്തവ സഭകളില് ജാതി നിര്ണ്ണായക ഘടകമാണെന്നും തേലക്കാട് പറഞ്ഞിരുന്നു. തോമാശ്ലീഹ ബ്രാഹ്മണരെ ക്രിസ്ത്യാനികളാക്കിയെന്ന തരത്തിലുള്ള മിത്തുകള് തകര്ക്കപ്പെടണമെന്ന് യാക്കോബായ സഭ നിരണം ഭദ്രാസനാധിപന് ഗീവര്ഗ്ഗീസ് മാര് കൂറിലോസിന്റെ ഫെയ്സ്ബുക് പോസ്റ്റിനെക്കുറിച്ച് പ്രതികരിക്കവേയായിരുന്നു ഫാദര് പോള് തേലക്കാട്ടിന്റെ നിര്ണായക വെളിപ്പെടുത്തല്.
‘ഒന്നാം നൂറ്റാണ്ടില് ഇവിടെ തോമാശ്ലീഹാ വന്ന് ബ്രാഹ്മണരെ മാമോദീസാ മുക്കിയെന്ന് പറയുന്നത് ശുദ്ധ അസംബന്ധം തന്നെയാണ്. അക്കാര്യം ബെനഡിക്ട് മാര്പാപ്പ പോലും ചൂണ്ടിക്കാട്ടിയിരുന്നു. എന്നാല് കേരളത്തിലെ ചില മതമേധാവികള് അതംഗീകരിക്കാന് തയ്യാറായില്ല. തോമാശ്ലീഹാ കേരളത്തിലെത്തിയെന്നതിന് വ്യക്തമായ തെളിവില്ല,’ തേലക്കാട്ട് പറഞ്ഞിരുന്നു
ക്രൈസ്തവ സഭകളില് മെത്രാനെ തിരഞ്ഞെടുക്കുമ്പോള് ജാതി നിര്ണ്ണായക ഘടകമാണെന്ന് തേലക്കാട് പറഞ്ഞിരുന്നു. ‘ബ്രാഹ്മണ്യത്തിന്റെ കേരളത്തിലേക്കുള്ള വരവോടെയാണ് ക്രൈസ്തവര്ക്കിടയില് ജാതിയുടെ വേര്തിരിവുകള് കടന്നു വന്നത്. അത് ഇന്നും നിലനില്ക്കുന്നു. സുറിയാനി ക്രിസ്ത്യാനികളും ലത്തീന് ക്രിസ്ത്യാനികളും തമ്മില് സാമൂഹ്യപരമായ അന്തരം ഇന്നും നിലനില്ക്കുന്നുവെന്നത് യാഥാര്ത്ഥ്യമല്ലേ?’ ‘മാര്ക്സിസത്തിലും ക്രൈസ്തവതയിലും സവര്ണ്ണ ജാതിബോധം കടന്നു വന്നതോടെയാണ് രണ്ടിലും ജാതി കാഴ്ചപ്പാടുകള് വേരോടിത്തുടങ്ങിയത്. ഇഎംഎസും പി. ഗോവിന്ദപ്പിള്ളയും പേരിനൊപ്പം വാല് ചേര്ക്കുന്നത് ഈ സവര്ണ ജാതി ബോധം കൊണ്ടു തന്നെയാണെന്നതില് സംശയമില്ല,’ തേലക്കാട്ട് വിശദീകരിക്കുന്നു.