ദോഹ: ലഹരിമരുന്നു കേസില് ശിക്ഷിക്കപ്പെട്ട് ഖത്തര് സെന്ട്രല് ജയിലില് കഴിയുന്ന മുംബൈ സ്വദേശികളായ ദമ്പതികളുടെ കേസ് വീണ്ടും പരിഗണിക്കാന് അപ്പീല് കോടതിക്ക് ഖത്തര് സുപ്രീം കോടതിയുടെ നിര്ദേശം. ദമ്പതികള് നല്കിയ ഹര്ജിയിലാണ് നിര്ദേശം.
ദമ്പതികളെ ശിക്ഷിച്ചു കൊണ്ടുള്ള കീഴ്ക്കോടതിയുടെ വിധി അപ്പീല് കോടതിയും ശരിവച്ചതിന്റെ അടിസ്ഥാനത്തിലാണ് ഇരുവരും സുപ്രീം കോടതിയെ സമീപിച്ചത്. അടുത്ത ബന്ധുവിന്റെ ചതിയാണ് ദമ്പതികളെ കുടുക്കിയതെന്ന് വ്യക്തമാക്കി ഇരുവരുടെയും കുടുംബങ്ങള് ഇന്ത്യയില് നല്കിയ കേസ് നാര്ക്കോട്ടിക്സ് കണ്ട്രോള് ബ്യൂറോയുടെ (എന്സിബി) നേതൃത്വത്തിലും പുരോഗമിക്കുകയാണ്.
ഇന്ത്യയില് നല്കിയ കേസിന്റെ രേഖകള് ഉള്പ്പെടെ ഹാജരാക്കിയാണ് സുപ്രീം കോടതിയില് ഹര്ജി നല്കിയത്. ഖത്തറിലെ ഇന്ത്യന് എംബസിയുടെ ഇടപെടലിനെ തുടര്ന്ന് പബ്ലിക് പ്രോസിക്യൂഷന് ദമ്പതികളെ വിളിച്ച് വീണ്ടും അന്വേഷണം നടത്തിയിരുന്നു. ദോഹയിലെ ലീഗല് കണ്സല്റ്റന്റായ നിസാര് കോച്ചേരി മുഖേന സ്വദേശി അഭിഭാഷകനായ അബ്ദുല്ല ഇസ അല് അന്സാരിയാണ് ദമ്പതികള്ക്കായി കേസ് വാദിക്കുന്നത്.
2019 ജൂലൈയില് മധുവിധു ആഘോഷിക്കാനായി ദോഹയിലെത്തിയ ദമ്പതികളായ മുഹമ്മദ് ഷെറീഖും ഒനിബയുമാണ് ലഹരിമരുന്നു കേസില് തടവില് കഴിയുന്നത്. ഹമദ് രാജ്യാന്തര വിമാനത്താവളത്തില് വന്നിറങ്ങവെ ഇവരുടെ ബാഗില് നിന്നും 4 കിലോ ലഹരിമരുന്ന് ഒളിപ്പിച്ച നിലയില് കണ്ടെത്തുകയായിരുന്നു.
സാഹചര്യത്തെളിവുകളുടെ അടിസ്ഥാനത്തില് കുറ്റക്കാരെന്ന് കണ്ടെത്തിയതിനെ തുടര്ന്ന് കീഴ്ക്കോടതിയാണ് ഇരുവര്ക്കും 10 വര്ഷം വീതം തടവും 3 ലക്ഷം റിയാല് വീതം പിഴയും വിധിച്ചത്. ഗര്ഭിണിയായിരിക്കെ ഒനിബയെ ബന്ധു നിര്ബന്ധിച്ച് മധുവിധുവിന് ദോഹയിലെത്തിക്കുകയായിരുന്നു.
—