സ്വര്‍ണക്കടത്ത് കേസിലെ മുഖ്യപ്രതി സ്വപ്ന സുരേഷ് മജിസ്‌ട്രേട്ടിനു നല്‍കിയ രഹസ്യ മൊഴിയിലെ കൂടുതല്‍ വിവരങ്ങള്‍ പുറത്ത്. മുഖ്യമന്തിയും സ്പീക്കറും മന്ത്രിമാരും ഡോളര്‍ കടത്തില്‍ പങ്കാളികളാണെന്ന് സ്വപ്ന രഹസ്യമെഴി നല്‍കിയെന്ന റിപ്പോര്‍ട്ട് പുറത്തുവന്നിരുന്നു. അതിനു പിന്നാലെ സര്‍ക്കാരിലെ ഉന്നതരുടെ അസാന്മാര്‍ഗിക പ്രവൃത്തികളെക്കുറിച്ച് തനിക്കറിയാമെന്നും സ്വപ്ന പറഞ്ഞതായാണ് പുതിയ റിപ്പോര്‍ട്ട്.
രാഷ്ട്രീയ-ഉദ്യോഗസ്ഥ ഉന്നതരടക്കം ഇതിലുണ്ടെന്നാണ് വെളിപ്പെടുത്തല്‍. കസ്റ്റംസ് അന്വേഷണസംഘം ഹൈക്കോടതിയില്‍ സമര്‍പ്പിച്ച രേഖയിലും ഇതുസംബന്ധിച്ച പരാമര്‍ശമുണ്ട്.
ഉന്നതരുടെ നിയമവിരുദ്ധവും അനുചിതവുമായ പ്രവൃര്‍ത്തികളെക്കുറിച്ചും അറിയാം. ഉന്നതപദവിയിലുള്ള ചില വ്യക്തികള്‍ വിവിധ ഇടപാടുകളിലായി കോഴപ്പണം കൈപ്പറ്റിയിട്ടുണ്ട്. ചില ഇടപാടുകളില്‍ അറബി പരിഭാഷകയാകാന്‍ നിര്‍ബന്ധിതയായതിനാല്‍ തനിക്ക് ഇടപാടുകളെക്കുറിച്ച് എല്ലാമറിയാം. എല്ലാത്തിനും താന്‍ സാക്ഷിയാണ്. അനധികൃത പണമിടപാടുകളില്‍ ഉന്നതരാഷ്ട്രീയ നേതൃത്വത്തിന്റെ ഇടനിലക്കാരിയായി പ്രവര്‍ത്തിച്ചു. സംസ്ഥാന സര്‍ക്കാരിന്റെ വിവധ പദ്ധതികളുടെ മറവിലാണ് ഇതെല്ലാം നടന്നതെന്നും സ്വപ്ന നല്‍കിയ രഹസ്യമൊഴിയിലുണ്ട്.
