കോവിഡ് വ്യാപനം വര്‍ധിക്കുന്ന സാഹചര്യത്തില്‍ കോവിഡ് പ്രോട്ടോക്കോള്‍ പാലിക്കുന്നത് ഉറപ്പാക്കാനും നിയമ ലംഘനങ്ങള്‍ തടയാനും ജില്ലയില്‍ 67 സെക്ടറല്‍ മജിസ്‌ട്രേറ്റുമാരെ നിയമിച്ചതായി ജില്ലാ കളക്ടര്‍ ഡോ. നവ്ജ്യോത് ഖോസ അറിയിച്ചു. പഞ്ചായത്തുകളില്‍ 34-ഉം മുനിസിപ്പാലിറ്റികളില്‍ നാലും കോര്‍പ്പറേഷനില്‍ 10ഉം സെക്ടറല്‍ മജിസ്ട്രേറ്റുമാരെയാണു നിയമിച്ചിട്ടുള്ളത്. ഇതിനുപുറമേ തിരക്കു കൂടാന്‍ സാധ്യതയുള്ള നഗര മേഖലകളില്‍ 17 സെക്ടറില്‍ മജിസ്ട്രേറ്റുമാരെക്കൂടി നിയമിച്ചു.
നിയന്ത്രണങ്ങള്‍ കര്‍ശനമായി നടപ്പാക്കുന്നതിന്റെ ഭാഗമായി എല്ലാ പ്രദേശങ്ങളിലും പരിശോധന ശക്തമാക്കും. കോവിഡ് മാനദണ്ഡങ്ങളുടെ ലംഘനം ശ്രദ്ധയില്‍പ്പെട്ടാല്‍ കര്‍ശന നടപടി സ്വീകരിക്കും. കോവിഡ് പ്രതിരോധത്തിന്റെ ഭാഗമായി സര്‍ക്കാര്‍ പുറപ്പെടുവിച്ചിരിക്കുന്ന നിര്‍ദേശങ്ങള്‍ കര്‍ശനമായി നടപ്പാക്കും. ഓരോ വാര്‍ഡിലെയും കൗണ്‍സിലര്‍മാര്‍, പൊതു സംഘടനകള്‍, റാപ്പിഡ് റെസ്പോണ്‍സ് ടീം തുടങ്ങിയവരുടെ സേവനം സെക്ടറല്‍ മജിസ്‌ട്രേറ്റുമാരുടെ പ്രവര്‍ത്തനത്തിനു പ്രയോജനപ്പെടുത്തുമെന്നും കളക്ടര്‍ അറിയിച്ചു.
