സംവരണത്തിന് ഇന്ത്യയിൽ ആയിരക്കണക്കിന് വർഷത്തെ പഴക്കമുണ്ട്. ജാതി സംവരണം ഭാരതീയ പാരമ്പര്യത്തിന്റെ മഹത്തായ ഭാഗമാണ്.ഇന്ത്യയ്ക്ക് സ്വാതന്ത്ര്യം കിട്ടുന്നതുവരെ 100% ആയിരുന്നു ജാതി സംവരണം. ജോലിക്കും വിദ്യാഭ്യാസത്തിനും മാത്രമല്ല, അധികാരം, വ്യവസായം, ദാസ്യവൃത്തി ഇതൊക്കെയായിരുന്നു 100% സംവരണമുണ്ടായിരുന്ന കാര്യങ്ങൾ.കൂടാതെ ഭൂമിയുടെ ഉടമയാകാനും 100% സംവരണം ഉണ്ടായിരുന്നു. ബ്രാഹ്മണർ, ക്ഷത്രിയർ, വൈശ്യർ പിന്നെ ദാസ്യവൃത്തി ചെയ്തിരുന്ന ശൂദ്രർ എന്നിവരായിരുന്നു 100% സംവരണം അനുഭവിച്ചിരുന്നത്.
സ്വാതന്ത്ര്യ സമരത്തിൽ പങ്കെടുക്കാൻ പോലും ആദ്യകാലത്ത് 100% സംവരണ ജാതികൾക്ക് മാത്രമായിരുന്നു അധികാരം. ദൈവത്തെ കാണാനും ആരാധിക്കാനും ദൈവ വഴികളിൽ നടക്കാനും 100% ജാതി സംവരണം ആയിരുന്നു.ബാഹുബലി പോലെ ഒരു വീരൻ അറിവും വിദ്യാഭ്യാസവും നേടി അംബേദ്കർ എന്ന പേരിൽ ഉയർന്നുവന്നു.അദ്ദേഹമാണ് 100% സംവരണ ജാതികളിൽ നിന്നും കുറച്ച് കാര്യങ്ങൾക്കുള്ള അവസരം മനുഷ്യവിഭാഗത്തിൽ പെടുത്താതിരുന്ന പഞ്ചമർക്ക് നൽകിയത്.അങ്ങനെ മഹത്തായ ഭാരതീയ പൈതൃകത്തിലെ 100% ജാതി സംവരണം ഇല്ലാതായി.
പഞ്ചമർക്ക് അംബേദ്കർ കൊടുത്ത തുച്ഛമായ സംവരണം തിരിച്ചുപിടിക്കാൻ കാലകേയന്മാർ കഴിഞ്ഞ 70 വർഷമായി ഒളിയുദ്ധം നടത്തുന്നു.എന്നെങ്കിലും തങ്ങളുടെ 100 % സംവരണം തിരിച്ചുപിടിക്കാൻ എല്ലായിടത്തും പലവേഷങ്ങളിലും ഗറില്ലാ സമരത്തിലാണ് നൂറ് ശതമാന ജാതിക്കാർ.അവരാണ് നൂറ്റുവർ അഥവാ കൗരവർ എന്നറിയപ്പെടുന്നത്.നൂറ്റുവരുടെ രഹസ്യപടയാളികൾ പല പാർട്ടികളിലും, പത്രങ്ങളിലും ചാനലുകളിലും ഇരുന്ന് തങ്ങളുടെ പഴയ 100% തിരിച്ചുപിടിക്കാനുള്ള ഗറില്ലാ സമരത്തിലാണ്.നൂറ്റുവർ വീടുകളിൽ തങ്ങളുടെ കുഞ്ഞുങ്ങളോട് തങ്ങൾക്ക് നഷ്ടപ്പെട്ട 100% നിരന്തരം നാടോടിക്കഥകളായി പറഞ്ഞു പഠിപ്പിക്കുന്നുണ്ട്. കഥ കേട്ട് വളരുന്ന നൂറ്റുവരുടെ തലമുറകൾ 100% ജാതി സംവരണം തിരിച്ചുപിടിക്കേണ്ടതിന്റെ ധാർമ്മിക പ്രശ്നങ്ങൾ രഹസ്യമായും പരസ്യമായും ചർച്ച ചെയ്യുന്നു.
പലവട്ടം പോരാട്ടത്തിന് ഉപയോഗിക്കുന്ന ഭാരതീയ ഗറില്ലാ സമരമുറകളിൽ ഒന്നാണ് സാമ്പത്തിക സംവരണം. ഒന്നാന്തരം വാരിക്കുഴിയായി ഉപയോഗിക്കാൻ 100% നൂറ്റുവർ ഇതിനെ രൂപപ്പെടുത്തിയിട്ടുണ്ട്. എന്നാലും പ്രതാപവാനായ അംബേദ്കറോടുള്ള ഭയംമൂലം പോരാളികൾ പരാജയപ്പെടുന്നത് ഭാരതീയ പൈതൃകത്തിന് ചേർന്നതല്ലെന്ന് നൂറ്റുവ പോരാളി നായകന്മാർ ചാവേർ പടയെ ഉദ്ബോധിപ്പിക്കാറുണ്ട്. 100% ജാതി സംവരണം തങ്ങൾക്ക് പരമ്പരയായി ദൈവിക തീരുമാനത്താൽ കൈവന്നതായിരുന്നു എന്നും, 1800 വർഷം രാജകീയമായി തങ്ങളനുഭവിച്ച സംവരണത്തെ മറ്റാരുമായും പങ്കുവയ്ക്കില്ലെന്നും അവർ നിത്യവും പ്രതിജ്ഞ ചെയ്യുന്നുണ്ട്.
100% സംവരണം തിരിച്ചു വരുമോ….?
അംബേദ്കർ ഭയം ഇല്ലാതാകുമോ…?
ബാഹുബലിയെ കൊന്നപോലെ പുറകീന്ന് കുത്താൻ ഏതെങ്കിലും കട്ടപ്പ സഖാവ് വരുമോ…?
ഉദ്വേഗജനകമായ കാര്യങ്ങൾ ഇനിയും ഉണ്ട് …
ജയ് മാഹിഷ്മതി.
