കേരളത്തിൽ ദുരഭിമാനക്കൊല നടന്നെന്നും എന്തോ അപകടം സംഭവിക്കാൻ പോകുന്നെന്നും മാധ്യമങ്ങളിൽ വലിയ വാർത്ത .
കേരളത്തിൽ ജാതിയില്ല എന്ന് കരുതുന്നവരാണോ സത്യത്തിൽ നമ്മളൊക്കെ ?
കേരളത്തിൽ ജാതിയുണ്ട് . കൊടികുത്തിവാഴുന്ന ജാതിവിവേചനമുണ്ട് .
അത്‌ തിരിച്ചറിയുന്നില്ലെങ്കിൽ അതിന്റെ കാരണം ദളിതർ അത്രക്കും സമൂഹത്തിൽ അദൃശ്യനായി പോയത് കൊണ്ടാണ് . എവിടെയും അവരെ കാണാൻ പോലും ഇല്ല . പി സി ജോർജ് നടത്തുന്ന ദളിത് വിരുദ്ധ പരാമർശങ്ങൾ നാം കേൾക്കുന്നുണ്ട് . എന്നാൽ അതിനെക്കുറിച്ച് ദളിതർ എന്ത് പറയുന്നുവെന്നത് പോലും നമുക്ക് അറിയില്ല .
മാധ്യമങ്ങൾ മൈക്ക് കൊടുക്കുന്നത് പി സി ജോർജുമാർക്കാണ് , ഒരു ദളിതനും ഇന്നും കേരളത്തിൽ എവിടെയും അർഹമായ സ്ഥാനം പോയിട്ട് അതിജീവിക്കാനുള്ള ഇടം പോലും ലഭിക്കുന്നില്ല .
ന്യൂസ് റൂമുകളിൽ പോലും ജാതി കൊടി കുത്തി വാഴുന്നുണ്ട് . എത്ര ദളിത് ജേർണലിസ്റ്റുകൾക്ക് ജോലിയുണ്ട് ?അതിൽ എത്ര പേര് മുഖ്യധാരയിലുണ്ട് ?
ചത്ത് ജീവിക്കുന്ന എത്രയോ ദുരഭിമാന ഇരകൾ നമുക്കിടയിലുണ്ട് .
എത്രയോ പെൺകുട്ടികൾ ” തേപ്പുപെട്ടികൾ ” എന്ന പേരിൽ അറിയപ്പെട്ടത് എന്ത് കൊണ്ടാണ് ?
ഇന്ത്യയിൽ പ്രണയ പരാജയങ്ങൾക്കു കാരണം വീട്ടുകാരാണെന്നു സുപ്രീം കോടതി നിരീക്ഷിച്ചിട്ടുണ്ട് . 1995 പ്രണയ വിവാഹത്തിന് വീട്ടുകാർ എതിർത്തതു മൂലം ആത്മഹത്യക്കു ശ്രമിച്ചതിനെ തുടർന്ന് പെൺകുട്ടി മരിച്ച കേസിൽ വിധി പറയുമ്പോഴാണ് കോടതിയുടെ നിരീക്ഷണം. കേസില്‍ കാമുകന് ജീവപര്യന്തം തടവ് വിധിച്ച കീഴ്കോടതി വിധി റദ്ദാക്കിക്കൊണ്ടാണ് സുപ്രീംകോടതി ഇങ്ങനെ പറഞ്ഞത്.”
ഇതേ അവസ്ഥ തന്നെയാണ് ഇന്ത്യയിലും കേരളത്തിലും ഇന്ന് നിലനിൽക്കുന്നത് .
പ്രണയിക്കുന്നത് ജാതി നോക്കി തന്നെയാണ് . തേക്കുന്നതും ജാതി നോക്കി തന്നെ . അതിനു ശേഷം ഇഷ്ടമില്ലാത്ത വിവാഹത്തിന് വഴങ്ങി എത്രയോ പേര് ചത്ത് ജീവിക്കുന്നു .
എത്രയോ പേര് വിവാഹശേഷം ആത്മഹത്യ ചെയ്യുന്നു . ഉടൻ നമ്മളത് ഭർത്താവിന്റെ ചുമലിൽ വക്കും . ഭർതൃപീഡനം എന്ന് .
എത്രയോ പെൺകുട്ടികൾ വിവാഹശേഷവും വിവാഹത്തിന് മുൻപും ആത്മമഹത്യ ചെയ്യുന്നു . ദുരൂഹസാഹചര്യത്തിൽ കൊല്ലപ്പെടുന്നു . ഇതിൽ പലതും ദുരഭിമാന ആത്മഹത്യകളും കൊലകളും തന്നെയായിരുന്നു .
ഇന്ന് ചാനലുകളിൽ മുഴുവൻ ഈ വിഷയം ചർച്ച ചെയ്തത് ആരാണ് ? പേരിനു പുറകിൽ അഭിമാന വാലുള്ളവർ . അവിടെ പോലും ദളിതർ അദൃശ്യരാണ് .
കേരളത്തിലെ വിവാഹ പരസ്യ സൈറ്റുകളുടെ പേരുകൾ ശ്രദ്ധിച്ചിട്ടുണ്ടോ ? ക്രിസ്ത്യൻ മാട്രിമോണി , നായർ മാട്രിമോണി…. അല്ലെ ?
എന്നിട്ടും നാം അത്ഭുതത്തോടെ ഞെട്ടൽ രേഖപ്പെടുത്തുന്നു . എന്ത് ഇവിടെ ജാതിയോ എന്ന് .
മതം മാറ്റം നടക്കുമ്പോൾ പോലും നായരോ നമ്പൂതിരിയെ ഒക്കെ മതം മാറിയാൽ വിലയുണ്ട് . മറിച്ചു ദളിതൻ ഏത് മതത്തിലേക്ക് മാറിയാലും ദളിതൻ തന്നെ .
കേരളത്തിൽ ആദ്യത്തെ ദുരഭിമാനക്കൊല എന്ന് പറയുമ്പോൾ ഓർക്കുക
കാരണമറിയാതെ മരിച്ച അനേകരുടെ മുഖങ്ങൾ …
തീവണ്ടിക്കു മുന്നിൽ ചാടിയ എത്രയോ കമിതാക്കളെ …
കിണറ്റിൽ ചാടി മരിച്ച പെൺകുട്ടികളെ ..
ഉത്തരത്തിൽ തൂങ്ങിയാടിയ സ്ത്രീകളെ ..
വിഷം കുടിച്ചു മരിച്ച മനുഷ്യരെ …
നാടുവിട്ടു പോയവരെ … കാണാതായവരെ ….
അതിനൊപ്പം മറ്റു ചിലരെ കൂടി ഓർക്കുക .
വിവാഹശേഷം ഒളിച്ചോടി പോകുന്ന ചിലരെ കുറിച്ചൊക്കെ അത്ഭുതം തോന്നാറില്ലേ ?
വയസ്സായി വിവാഹം കഴിക്കുന്നവരെ കുറിച്ചും ?
ദുരഭിമാനത്താൽ മരിച്ചു ജീവിച്ചവരാണ് പലരും … എല്ലാ ഉത്തരവാദിത്തങ്ങളും തീരുമ്പോൾ , അവർ സ്വന്തം ഇഷ്ടം നിറവേറ്റുന്നു .
“നിങ്ങൾ ഓഫീസറായി പണിയെടുക്കേണ്ട സ്ഥലത്ത് നിങ്ങൾ വിധി പറയേണ്ട ഒരു കേസിൽ ഒരു ഭാഗത്ത് ന്യായവും മറുഭാഗത്ത് ഒരു നായാടിയും ഇരുന്നാൻ നിങ്ങൾ എന്ത് തീരുമാനമാണെടുക്കുക?”
ഐ എ എസ് ഇൻറർവ്യൂ ബോർഡിന്റെ ചോദ്യത്തിന് നായാടിജാതിക്കാരനായ ധർമപാലൻ തന്റെ ജീവിതം കൊണ്ട് മറുപടി പറയുന്നു:
“ഒരു നായാടിയെയും മറ്റൊരു മനുഷ്യനെയും രണ്ട് വശത്ത് നിർത്തുകയാണങ്കിൽ സമത്വം എന്ന ധർമ്മത്തിന്റെ അടിസ്ഥാനത്തിൽ ആ ക്ഷണം തന്നെ നായാടി അനീതിക്കിരയായവനായി മാറിക്കഴിഞ്ഞു .അവൻ എന്തു തന്നെ ചെയ്തിട്ടുണ്ടെങ്കിലും അവൻ നിരപരാധിയാണ് .”
ജയമോഹന്റെ നൂറു സിംഹാസനങ്ങളിൽ നിന്നുള്ള ഈ ഭാഗം പറഞ്ഞു കൊണ്ട് നിർത്തുന്നു .
