എം.കെ ഹരികുമാർ
ഫെബ്രുവരി 14 നാണു ശ്രീകുമാരൻ തമ്പി സാറിനെ കൂട്ടി എം.കെ. അർജ്ജുനൻ മാഷുടെ വീട്ടിൽ പോയത്‌. 84 തികയുന്ന അർജ്ജുനൻ മാഷും 80 ലെത്തുന്ന തമ്പി സാറും മനോരമയ്ക്കുവേണ്ടി ഓർമ്മകളുടെ ഈണമൊരുക്കുകയായിരുന്നു. അർജ്ജുനൻ മാഷ്‌ ഏറെ അവശനായതിനാൽ ആ സംഗമം പള്ളുരുത്തിയിലെ അദ്ദേഹത്തിന്റെ വീട്ടിലേ സാധ്യമാകുമായിരുന്നുള്ളൂ. പക്ഷേ, അന്ന് മാഷ്‌ പതിവിലേറെ പ്രസന്നനായി. പറഞ്ഞിട്ടും പാടിയിട്ടും മതിയാവാത്തതുപോലെ… ഓർമ്മക്കൊളുത്തിട്ടു തമ്പി സാർ കൊരുത്തതൊക്കെ അർജ്ജുനൻ മാഷ്‌ സംഗീതാത്മകമാക്കി; അവർക്കിടയിലെ അര നൂറ്റാണ്ടുകാലം പാടിത്തീർക്കാൻ ആ കുറഞ്ഞ സമയം മതിയാവില്ലായിരുന്നെങ്കിലും.
ഫ്ലൈറ്റിനു പോകേണ്ടതിനാൽ തമ്പി സാർ പോകാനിറങ്ങി. ‘അയ്യോ, പോവുകയാണോ’ എന്നൊരു കുട്ടിത്തഭാവം അപ്പോൾ അർജ്ജുനൻ മാഷുടെ മുഖത്തു കണ്ടു. മടങ്ങുമ്പോൾ തമ്പി സാറും പറഞ്ഞു: ‘അദ്ദേഹത്തിനു കുറേക്കൂടി സംസാരിക്കാൻ മൂഡുണ്ടായിരുന്നു’.
‘പാർവ്വതി മന്ദിര’ത്തിൽനിന്ന് ഇറങ്ങാൻ തുടങ്ങുമ്പോൾ അർജ്ജുനൻ മാഷ്‌ വീൽ ചെയർ ഉരുട്ടി വാതിൽക്കലേക്കു വന്നു. അതിനിടയിൽ അപ്രതീക്ഷിതമായി തമ്പി സാർ തിരിഞ്ഞുനിന്ന് പ്രിയ സ്നേഹിതന്റെ നെറുകയിലൊരുമ്മ കൊടുത്തു. ഈ മഹാമാരിക്കാലമായിരുന്നില്ലെങ്കിൽ, പ്രിയ പാട്ടുകൂട്ടുകാരനെ അവസാനമായി കാണാൻ വരുമ്പോൾ ഇന്നു കൊടുക്കേണ്ടിയിരുന്ന അന്ത്യചുംബനം!
ക്യാമറയിലൊപ്പാനുള്ള ഇടവേള പോലും കിട്ടാതെ, മനസ്സിൽ മാത്രം പതിഞ്ഞ ആ രംഗം കഴിഞ്ഞു പുറത്തിറങ്ങുമ്പോൾ കൃത്യം, ചെമ്പകത്തൈകൾ പൂത്ത മാനത്ത്‌ പൊന്നമ്പിളി ചുംബനം കൊള്ളാനൊരുങ്ങിനിൽക്കുന്നു! ഗാനവും ഗഗനവും പത്മരാഗം പോലെ പുഞ്ചിരിക്കുകയായിരുന്നു, അപ്പോൾ…!
ഈണങ്ങളുടെ വില്ലുകുലച്ച്‌, ഗാനങ്ങളുടെ പൂവമ്പുകളെയ്ത അർജ്ജുനവീര്യത്തിനു സാദരപ്രണാമം.
