ലോസ് ആഞ്ചലസ്: കോവിഡ്-19 വൈറസിന്‍റെ പശ്ചാത്തലത്തിൽ ഓസ്കർ നിബന്ധനകളിൽ മാറ്റം വരുത്തി. തീയറ്ററുകളിൽ പ്രദർശിപ്പിക്കാത്ത സിനിമകളും ഇനി ഓസ്കറിന് പരിഗണിക്കുമെന്ന് അക്കാദമി ഓഫ് മോഷൻ പിക്ചേഴ്സ് ആന്‍റ് ആർട്സ് അറിയിച്ചു.
കോവിഡ് ഭീഷണിയെത്തുടർന്ന് നിലനിവിൽ തീയറ്ററുകൾ അടച്ചിട്ടിരിക്കുകയാണ്. ഈ ഒരു സാഹചര്യത്തിൽ പല ചിത്രങ്ങളും ഓൺലൈൻ സ്ട്രീമിംഗ് വഴിയാണ് പ്രദർശിപ്പിക്കുന്നത്. ഇതിനാലാണ് ഓസ്കർ നിബന്ധനകളിൽ മാറ്റം വരുത്താൻ തീരുമാനിച്ചത്.
മികച്ച ചിത്രത്തിനായുള്ള കാറ്റഗറിയിൽ ഓൺലൈൻ റിലീസ് ചെയ്ത സിനിമകൾക്കും അപേക്ഷിക്കാം. അതേസമയം, തീയറ്ററുകൾ തുറക്കുന്നതോടെ മാനദണ്ഡങ്ങൾ പഴയതുപോലെ ആകുമെന്നും ഓസ്കർ ഭരണസമിതി അറിയിച്ചു.
ഇതുവരെ മികച്ച ചിത്രത്തിനായുള്ള കാറ്റഗറിയിൽ ഉൾപ്പെടുന്ന സിനിമകൾ തുടരെ ഏഴു ദിവസങ്ങളിൽ, ദിവസേന മൂന്ന് ഷോ വീതം തീയറ്ററുകളിൽ പ്രദർശിപ്പിച്ചിരിക്കണമെന്നായിരുന്നു മാനദണ്ഡം.
