തിരുവനന്തപുരം : പ്രായപൂര്‍ത്തിയാകാത്ത പെണ്‍കുട്ടിയെ പ്രണയം നടിച്ച്‌ കടത്തിക്കൊണ്ടുപോയ കേസിലെ പ്രതി അറസ്റ്റിൽ. തിരുവനന്തപുരം പെരിങ്ങമല അടിപ്പറമ്പ്, ചോനമല അമൽ ഭവനിൽ അരോമൽ (21) ആണ് അറസ്റ്റിലായത്. പെരിങ്ങമല സ്വദേശിയായ 16 വയസുള്ള പെൺകുട്ടിയ കാണാനില്ലെന്ന ബന്ധുക്കളുടെ പരാതിയിൽ പാലോട് പൊലീസ് നടത്തിയ അന്വേഷണത്തിലാണ് ആരോമല്‍ കുടുങ്ങിയത്. സൈബര്‍ സെല്ലിന്‍റെ സഹായത്തോടെയാണ് പെൺകുട്ടിയെയും പ്രതിയെയും പൊലീസ് കണ്ടെത്തിയത്.
മൊബൈൽ ടവർ ലൊക്കേഷൻ അനുസരിച്ച് പെൺകുട്ടിയും യുവാവും കല്ലമ്പലം ഭാഗത്ത് ഉള്ളതായി പൊലീസ് കണ്ടെത്തി. തുടർന്ന് ഇരുവരേയും സ്റ്റേഷനിലേക്ക് കൂട്ടിക്കൊണ്ടു വരികയായിരുന്നു. വിശദമായ ചോദ്യം ചെയ്യലിലാണ് പെൺകുട്ടിയെ സ്നേഹം നടിച്ചു കടത്തിക്കൊണ്ടു പോയി ലൈംഗിക ചൂഷണത്തിന് ഇരയാക്കുകയായിരുന്നു ലക്ഷ്യമെന്ന് മനസിലായത്. വൈദ്യ പരിശോധനയിൽ പെണ്‍കുട്ടി പീഡനത്തിന് ഇരയായതായി കണ്ടെത്തിയിട്ടുണ്ട്. തുടർന്ന് പ്രതിക്കെതിരെ പോക്സോ നിയമപ്രകാരം കേസ് രജിസ്റ്റർ ചെയ്യുകയായിരുന്നു. ആരോമലിനെ നെടുമങ്ങാട് കോടതിയിൽ ഹാജരാക്കി റിമാന്‍ഡ് ചെയ്തു.
പാലോട് പൊലീസ് സ്റ്റേഷനിലെ ഒരു വധശ്രമക്കേസിലും ഇയാൾ പ്രതിയാണ്. നെടുമങ്ങാട് ഡിവൈഎസ്പി ജെ.ഉമേഷിന്റെ മേൽനോട്ടത്തിൽ പാലോട് ഇൻസ്പെക്ടർ സി കെ മനോജ് , എസ്‌ഐ നിസ്സാറുദീൻ, ജിഎസ്ഐ ഭുവനചന്ദ്രൻ നായർ, എഎസ്‌ഐ അജി , രാജേഷ്, നസീറ, ഷിബു , നിസ്സാം വിനീത് എന്നിവരടങ്ങിയ സംഘമാണ് പ്രതിയെ പിടികൂടിയത്.
