സാഹിത്യ അക്കാദമി സാധാരണക്കാരുടേതുമാണ്:വൈശാഖൻ (വിജയ്.സി.എച്ച് )

️ ഭിന്നശേഷിക്കാരെ മറന്നില്ല

ആദ്യമായി ചെയ്തത് അക്കാദമിയിലെ സകല ഹാളുകളിലേക്കും വേദികളിലേക്കും അവർക്ക് വീൽചെയറിൽ ഇരുന്നു എത്തിപ്പെടാൻ ആവശ്യമായ റേമ്പുകൾ നിർമ്മിക്കലാണ്. അവരുടെ പ്രഥമ കലാ-സാഹിത്യ പരിപാടി അക്കാദമി ഹാളിൽവച്ചു താമസിയാതെ നടത്തി. കലാകാരന്മാർ വീൽചെയറിൽ റേമ്പുവഴി കയറി വേദിയിൽ പരിപാടികൾ അവതരിപ്പിച്ചു!
മത്സ്യത്തൊഴിലാളികളെയും, കുടുംബശ്രീക്കാരെയും, മെഡിക്കൽ വിദ്യാർത്ഥികളെയും, സ്കൂൾ വിദ്യാർത്ഥികളെയും, ഭിന്നശേഷിക്കാരെയും സാഹിത്യവുമായി സമന്വയിപ്പിക്കുന്ന കർമ്മ പരിപാടികൾ അക്കാദമിയുടെ ചരിത്രത്തിൽതന്നെ ആദ്യമായാണ് അരങ്ങേറുന്നത്! സെക്രട്ടറി ഡോ.കെ.പി.മോഹനൻറെ കർമ്മനിരതതയും, ജെനറൽ കൗൺസിൽ-എക്സിക്യൂട്ടീവ് കൗൺസിൽ അംഗങ്ങളുടെ ധൈഷണികതയുമാണ് ഈ വിജയങ്ങളുടെയെല്ലാം പുറകിലുള്ളത്!

️ പരിസ്ഥിതിയും സാഹിത്യവും

പ്രളയം കേരളത്തെ ദുരന്തത്തിലാഴ്ത്തി. പ്രകൃതിയെ എഴുത്തുകാർ അടുത്തറിയണമെന്നുവന്നു. അതിനാൽ ആ വഴിക്കും ചിന്തിച്ചു. പരിസ്ഥിതിയെക്കുറിച്ചുള്ള അവബോധം എഴുത്തുകാരിൽ വർദ്ധിപ്പിക്കാനായി സൈലൻറ് വാലിയിലും തേക്കടിയിലുംവച്ച് രണ്ടു ക്യാമ്പുകൾ നടത്തി. ഏറെ ഫലപ്രദമായിരുന്നു ഈ ഉദ്യമവും.

️ ആദിവാസികളും ഓട്ടോക്കാരും പരിഗണനയിൽ

ആദിവാസികൾക്കുവേണ്ടി ഒരു സാഹിത്യസംഗമം വയനാട്ടിൽവച്ചു നടത്തി. നല്ല പ്രതികരണമായിരുന്നു. അൽപംകൂടി വലിയതൊന്ന് സജീവ പരിഗണനയിലുണ്ട്.
ഓട്ടോറിക്ഷ ഓടിക്കുന്നവരുടെ ഇടയിൽ ധാരാളം സാഹിത്യപ്രേമികളുണ്ടെന്ന് അക്കാദമി കണ്ടെത്തിയിരിക്കുന്നു. അവരുടെ അഭിരുചികൾ പരിപോഷിപ്പിക്കുന്നതിനുവേണ്ടി സാഹിത്യമേളകൾ നടത്താൻ ആലോചിച്ചുവരുന്നു. സാധാരണക്കാർക്ക് പ്രശസ്തരായ എഴുത്തുകാരുമായി ആശയ വിനിമയത്തിനുള്ള അവസരം ഒരുക്കിക്കൊടുക്കും.
എല്ലാവരിലും സഹൃദയത്വം ഉണ്ടാക്കിയെടുക്കുക, അല്ലെങ്കിൽ എല്ലാവർക്കും സാഹിത്യ പരിചയം ഉണ്ടാവുക, എന്നതാണ് ആശയം. സാഹിത്യം നിലനിൽക്കുന്നത് പണ്ഡിത-ഗവേഷണ ഗ്രന്ഥങ്ങളിലൂടെ മാത്രമല്ല, സാധാരണക്കാരായ വായനക്കാരിലൂടെയുമാണ്. അതിനാൽ, സാഹിത്യ അക്കാദമി സാധാരണക്കാരുടേതുമാണെന്ന് അവർക്കുകൂടി ബോദ്ധ്യപ്പെടണം! ഞങ്ങൾ കൊണ്ടുവന്നൊരു വീക്ഷണമാണിത്. ഇത് വളരെ മുന്നെത്തന്നെ കൊണ്ടുവരേണ്ടതുമായിരുന്നു!

️ ‘പ്രളയാക്ഷരങ്ങളി’ൽനിന്നുള്ളത് ദുരിതാശ്വാസത്തിന്

വെള്ളവും, വെള്ളപ്പൊക്കത്തിലെ അതിജീവനവും പ്രബല വിഷയമായുള്ള സാഹിത്യസൃഷ്ടികൾ ഉൾക്കൊള്ളിച്ചുകൊണ്ട് അക്കാദമി ഇറക്കിയതാണ് ‘പ്രളയാക്ഷരങ്ങൾ’! മുഖ്യമന്ത്രിയാണ് ഈ പുസ്തകം പ്രകാശനം ചെയ്തത്.
തകഴി ശിവശങ്കരപ്പിള്ള, സി. വി. ശ്രീരാമൻ, എം. ടി. വാസുദേവൻ നായർ, ടി. പത്മനാഭൻ തുടങ്ങിയ നിരവധി പ്രശസ്ത സാഹിത്യകാരന്മാരുടെ, പ്രളയമെന്ന പ്രകൃതിക്ഷോഭവുമായി ബന്ധപ്പെടുത്താവുന്ന അനേകം രചനകൾ അതിലുണ്ട്.
ഇതിൻറെ വിൽപ്പന ഇപ്പോഴും നന്നായി നടന്നുകൊണ്ടിരിക്കുന്നു. ‘പ്രളയാക്ഷരങ്ങളി’ൽനിന്നു കിട്ടുന്ന വരുമാനം മുഖ്യമന്ത്രിയുടെ ദുരിതാശ്വാസ നിധിയിലേക്കു (CMDRF) നൽകും.
ഈ കൊറോണാക്കാലത്തുതന്നെ അക്കാദമി ദുരിതാശ്വാസ നിധിയിലേക്കു 50 ലക്ഷം രൂപ കൊടുത്തു. ‘പ്രളയാക്ഷരങ്ങൾ‍’, ‘നവകേരളചിന്തകൾ‍’ എന്നീ പുസ്‌തകങ്ങളുടെ വിൽ‌പനയിൽനിന്ന്‌ സ്വരൂപിച്ച തുകയാണിത്.

️ ഡിജിറ്റൈസേഷൻ ദ്രുതഗതിയിൽ

അഞ്ചു സർവകലാശാലകളുടെ ഗവേഷണ കേന്ദ്രമാണ് അക്കാദമി ലൈബ്രറി. അതിനാൽ, അക്കാദമിക്ക് ഏറ്റവും വിലപ്പെട്ടതാണ് അതിൻറെ ഗ്രന്ഥശേഖരം. കാലപ്പഴക്കത്താൽ നശിച്ചുകൊണ്ടിരിക്കുന്ന അമൂല്യ ഗ്രന്ഥങ്ങൾ സോഫ്റ്റ് രൂപമാക്കി സൂക്ഷിക്കുന്നത് തകൃതിയായി നടക്കുന്നു.
ഡിജിറ്റൽ ലൈബ്രറിയുടെ പ്രവർത്തനങ്ങളും ഏറെ ഝടിതിയായി ഇപ്പോൾ മുന്നോട്ടു പോകുന്നു. ലോകത്തിൻറെ ഏതുഭാഗത്തിരുന്നാലും തനിക്കു പ്രിയപ്പെട്ട കൃതികൾ ഓൺലൈനിൽ സൗജന്യമായി വായിക്കാനും, ഡൗൺലോഡ് ചെയ്യാനും മലയാളിക്കു കഴിയണം. ഇക്കാരണത്താൽ, ഉയർന്ന മുൻഗണനയാണ് ഞങ്ങൾ ഡിജിറ്റൈസേഷനു നൽകിയിരിക്കുന്നത്.
കവിത്രയങ്ങളായ ഉള്ളൂരിൻറെയും, കുമാരനാശാൻറെയും, വള്ളത്തോളിൻറെയും സമ്പൂർണ്ണകൃതികളുൾപ്പെടെ, 1500-ൽ പരം പുസ്തകങ്ങൾ ഇതിനകം upload ചെയ്തുകഴിഞ്ഞു! ചങ്ങമ്പുഴയുടെ സമ്പൂർണ്ണകൃതികൾ അടുത്തമാസം അക്കാദമി സൈറ്റിൽ കയറും.
കൂടാതെ, മലയാളത്തിൽ പണ്ടുണ്ടായിരുന്ന രസികരജ്ഞിനി, മംഗളോദയം, വിദ്യാവിനോദിനി, ജയകേരളം മുതലായ വിശ്രുത ആനുകാലികങ്ങളും ഡിജിറ്റൈസ് ചെയ്യുന്നു. ഇവയെല്ലാം ഉടൻതന്നെ ഓൺലൈനിൽ വായനക്കാർക്ക് ലഭ്യമാകും. മലയാള ഭാഷയിൽ ഗവേഷണം ചെയ്യുന്നവർക്ക് ഡിജിറ്റൈസേഷൻ വലിയൊരു മുതൽക്കൂട്ടായിരിക്കും.

️ പതിവായ പുരസ്കാര ആരോപണങ്ങൾ

നൂറു ശതമാനം നീതി പാലിക്കാൻ പറ്റുന്നൊരു കാര്യമല്ല അവാർഡ് നിർണ്ണയം! പുരസ്കാരത്തിനെത്തുന്ന ആയിരക്കണക്കിനു പുസ്തകങ്ങൾ ഷോർട്ട്-ലിസ്റ്റ് ചെയ്യുന്നത് ഏറെ ശ്രമകരമാണ്. സാഹിത്യ സൃഷ്ടികളെ വിലയിരുത്താൻ കഴിവുള്ളവരെ ജഡ്ജസായി കണ്ടെത്തണം, അവർക്ക് സമയം വേണം. അക്കാദമിയുടെ നിർവാഹക സമിതി നിയമിക്കുന്ന ഏഴു ജഡ്ജസാണിതു ചെയ്യുന്നത്. ഗൗരവപൂർവ്വം വായിക്കുന്നവർ.
ഓരോ വിഭാഗത്തിലും പ്രസക്തികൊണ്ടും പുതുമകൊണ്ടും ഏറ്റവും നല്ല പത്തെണ്ണം തിരഞ്ഞെടുക്കയാണ് ഷോർട്ട്-ലിസ്റ്റിങ്ങിൽ നടക്കുന്നത്. അക്കാദമിയിൽ ഇരുന്നുതന്നെ ജഡ്ജിമാർ വായിക്കണം. ഇത്രയും രചനകൾ വായിച്ച് ചുരുക്കപ്പട്ടികയുണ്ടാക്കാൻ ചുരുങ്ങിയത് ആറു മാസമെങ്കിലും എടുക്കുന്നു!
പ്രസിഡൻറ് നിയമിക്കുന്ന ഉന്നതരായ മൂന്നു ഫൈനൽ ജഡ്ജസാണ് ഷോർട്ട്-ലിസ്റ്റ് ചെയ്ത പുസ്തകങ്ങൾ പിന്നീടു വായിക്കുന്നത്. പതിനെട്ട് (11+7) പുരസ്കാരങ്ങൾക്കായുള്ള അവസാനപാദ മൂല്യനിർണ്ണയമാണിത്. വളരെ രഹസ്യമായാണ് എല്ലാം നടക്കുന്നത്. ഏത് അവാർഡിനുവേണ്ടി ഏതു ജഡ്ജ് മൂല്യനിർണ്ണയം ചെയ്യുന്നുവെന്ന് ലൈബ്രറി സ്റ്റാഫിനുപോലും അറിയില്ല!
ചുരുക്കപ്പട്ടികയിൽ ഉള്ളവ പലതും മികച്ച സൃഷ്ടികളാകാം, പക്ഷെ പുരസ്കാരം ഒന്നല്ലെയുള്ളൂ. കിട്ടുന്നത് അർഹതയുള്ള ഒന്നിനായിരിക്കണം. അതുകൊണ്ടു തൃപ്തിപ്പെടുകയും വേണം! പത്തെണ്ണത്തിൽ താരതമ്യേന അർഹത കുറഞ്ഞ ഒന്ന് അവസാനം തിരഞ്ഞെടുക്കപ്പെടുമ്പോൾ നിരാശതോന്നും.
എന്നാൽ, പ്രസിഡൻറ് എന്ന നിലയിൽ ഒരു കാര്യം എനിക്ക് ഉറപ്പു പറയാൻ കഴിയും. യാതൊരുവിധ ഇടപെടലുകളും കഴിഞ്ഞ നാലു വർഷത്തിൽ അനുവധിച്ചിട്ടില്ല! സ്വാധീനം ചെലുത്താൻ ആരും ശ്രമിച്ചിട്ടില്ലെന്നല്ല പറയുന്നത്, അങ്ങിനെയുള്ള എല്ലാ ശ്രമങ്ങളും തടഞ്ഞുനിർത്തിയെന്നാണ്!
കഴിഞ്ഞ കമ്മിറ്റിക്കാർ ഒരു തവണ പുരസ്കാരങ്ങൾ നൽകിയില്ല. അതിനാൽ ഒരു വർഷം പിന്നിലാണ് പൊയ്ക്കൊണ്ടിരിക്കുന്നത്. ഇപ്പോൾ കൊടുത്തത് 2018-ലെ അവാർഡുകളാണ്. പെൻഡിൻങ് ഉള്ളതുകൂടി കൊടുത്തു പുരസ്കാരങ്ങൾ അപ്റ്റുഡേറ്റ് ആക്കാനുള്ള പ്രവർത്തനങ്ങൾ ഏകദേശം പൂർ‍ത്തിയായിക്കൊണ്ടിരിക്കുന്ന സമയത്താണ് കൊറോണവന്ന് എല്ലാം താറുമാറാക്കിയത്. മത്സരത്തിനെത്തിയ പുസ്തകങ്ങൾ വിലയിരുത്തിക്കഴിഞ്ഞിട്ടുണ്ട്.

️ ഏറെക്കുറെ സംതൃപ്തൻ

അക്കാദമിയുടെ അദ്ധ്യക്ഷൻ എന്ന നിലയിൽ സംതൃപ്തനാണോ എന്ന ചോദ്യത്തിന് ഉത്തരം നൽകാൻ ഞാൻ ഒരു ഇംഗ്ളീഷ് പഴഞ്ചൊല്ലിനെ ആശ്രയിക്കട്ടെ — Be contented, but not satisfied! സന്തോഷമായിരിക്കുക, അതൃപ്തമായിരിക്കുക!
അദ്ധ്യക്ഷനെന്ന നിലയിൽ ഇതുവരെ ചെയ്ത കാര്യങ്ങളിൽ സന്തോഷമുണ്ട്, എന്നാൽ ഇനി ചെയ്യാനുള്ള കാര്യങ്ങളെക്കുറിച്ച് ഓർക്കുമ്പോൾ അതൃപ്തിയുമുണ്ട്. നൂറു ശതമാനം സംതൃപ്തി കിട്ടുന്നൊരു കാര്യവും ജീവിതത്തിലില്ല, പക്ഷെ ഏറെക്കുറെ സംതൃപ്തനാണ്. ഒട്ടേറെ കാര്യങ്ങൾ ഇനിയും ചെയ്യണമെന്ന് മനസ്സിലുള്ളപ്പോൾ, എങ്ങിനെയാണ് പൂർണ്ണ സംതൃപ്തനാവാൻ
കഴിയുക?

️ റെയിൽവേ ജോലി തന്ന ജീവിത വീക്ഷണം

1964-ൽ സ്റ്റേഷൻമാസ്റ്ററായി ദക്ഷിണ റെയിൽവേയിൽ ജോലിയിൽ പ്രവേശിച്ചു. പിന്നീട് സ്റ്റേഷനുകളിൽനിന്ന് സ്റ്റേഷനുകളിലേക്കുള്ള യാത്രയായിരുന്നു എൻറെ ജീവിതം.
ആന്ധ്രയിലും, കർണ്ണാടകത്തിലും, തമിഴ്നാടിലും, കേരളത്തിലുമായി ഏകദേശം നൂറു സ്ഥലങ്ങളിൽ താമസിച്ചു! ലഭിച്ചത് ഇന്ത്യയിലെ അതിസാധാരണക്കാരായ മനുഷ്യരുമായി അടുത്തിടപഴകാനുള്ള അവസരമാണ്. ജീവിതത്തെക്കുറിച്ചുള്ളൊരു വീക്ഷണം രൂപീകരിക്കാൻ ഇതെന്നെ സഹായിച്ചു.
ജോലി കഴിഞ്ഞു തിരിച്ചു വീട്ടിൽ പോകാൻ കഴിയാത്ത രാത്രികളിൽ ഞാൻ പ്ലേറ്റ്ഫോമിലാണ് കിടന്നുറങ്ങിയിരുന്നത്. അടുത്ത ബെഞ്ചിൽ കിടക്കുന്നത് ചിലപ്പോൾ ഒരു ഭിക്ഷക്കാരനായിരിക്കും, അല്ലെങ്കിൽ ദരിദ്രനായൊരു കർഷകൻ. സർവ്വസാധാരണമായ ഇന്ത്യ എന്താണെന്നു ഞാൻ മനസ്സിലാക്കുകയായിരുന്നു.
എൻറെ അനുഭവങ്ങളിൽ മഹാൻമാരില്ല, ചരിത്ര സംഭവങ്ങളുമില്ല, സാധാരണ ജീവിതങ്ങളേയുള്ളൂ! ഈ ജീവിത വീക്ഷണമാണ് എൻറെ എഴുത്തുകൾക്ക് ആധാരം!

️ മലയാള സാഹിത്യം പുരോഗതിയിൽ

നമ്മുടെ സാഹിത്യം പുരോഗതിയുടെ പാതയിൽതന്നെയാണ്! യഥാസ്ഥിതികത്വത്തിനെതിരെ, അന്ധവിശ്വാസത്തിനെതിരെ, സമഗ്രാധിപത്യത്തിനെതിരെ, അതിശക്തമായി എഴുതുന്ന ധാരാളം പുതിയ എഴുത്തുകാരുണ്ടിവിടെ. വലിയ പ്രതീക്ഷയാണിത്! നവലോകത്ത് മനുഷ്യൻ നേരിടുന്ന വെല്ലുവിളികളെ അതിസൂക്ഷ്മമായ നിരീക്ഷണത്തോടുകൂടി അവതരിപ്പിക്കുന്ന നോവലുകളും, കഥകളും, കവിതകളും രചിക്കപ്പെടുന്നുണ്ട്. എഴുത്തുകാരുടെയും പ്രസിദ്ധീകരണങ്ങളുടെയും എണ്ണം കൂടിയിട്ടുമുണ്ട്. പുതിയ നൂറെഴുത്തുകാരിൽ പത്തുപേർ ഒന്നാന്തരമാണെങ്കിൽ, അതുതന്നെ മതിയല്ലൊ!

️ കുറച്ചു വായിച്ചു, കൂടുതൽ എഴുതുന്ന പ്രവണത

ദൃശ്യ-സമൂഹ മാധ്യമങ്ങളുടെ സ്വാധീനം കൊണ്ടായിരിക്കാം കുറച്ചു വായിക്കുകയും കൂടുതൽ എഴുതുകയും ചെയ്യുന്നൊരു പ്രവണത ശക്തി പ്രാപിച്ചു വരുന്നത്. ദൃശ്യ മാധ്യമങ്ങൾ വായനയെ പുറംതള്ളി. സമൂഹ മാധ്യമങ്ങളിൽ സ്വയം ആവിഷ്കരിക്കാൻ അവസരം ലഭിച്ചപ്പോൾ, കൂടുതൽ എഴുതാനും തുടങ്ങി! വിട്ടുവീഴ്ച്ച നടന്നത് എഴുത്തിൻറെ ഗുണനിലവാരത്തിലാണ്.
വായിക്കുന്നതിനേക്കാൾ താൽപര്യം എഴുതാൻ കാണിച്ചാൽ, അത് സാഹിത്യത്തിൻറെ നിലവാരത്തകർച്ചക്കു കാരണമാകും. കൂടുതൽ വായിക്കുക, അതിൽകൂടുതൽ ചിന്തിക്കുക, കുറച്ചെഴുതുക! അതാണ് ശരി. ക്ലാസ്സിക്കുകൾ ധാരാളം വായിക്കണം. നവമാധ്യമങ്ങളിൽ നല്ല എഴുത്തുകാരുണ്ട്, അല്ലാത്തവർ ശ്രദ്ധിക്കണം. അവർ വായിക്കപ്പെടില്ല. സെൻസറിംങ് ഓട്ടമാറ്റിക്കായിത്തന്നെ നടക്കും!