തിരുവനന്തപുരം: മോഹന്‍ലാല്‍ കൊച്ചി ഇളമക്കരയില്‍ പുതിയ വീട് വച്ചു. ഇപ്പോള്‍ താമസിക്കുന്ന, തേവരയിലെ വീട് വില്‍ക്കാനൊരുങ്ങുന്നു. താരവുമായി അടുത്ത വൃത്തങ്ങളാണ് ഇക്കാര്യം സൂചിപ്പിച്ചത്. ഇളമക്കരയിലേക്ക് താമസിക്കാതെ മാറുമെന്നറിയുന്നു. തേവരയില്‍ കായലോരത്തുള്ള വീടിനും സ്ഥലത്തിനും ഏകദേശം 20 കോടിയോളം വില വരും. നഗരഹൃദയത്തില്‍ പുതിയ വീട് പണിതതിനാലാണ് നഗരത്തില്‍ നിന്ന് കുറച്ചകലെയുള്ള വീട് വില്‍ക്കാന്‍ തീരുമാനിച്ചത്. ചെന്നൈ മറീന ബീച്ചിനടുത്ത് ഏഴ് കോടിയോളം ചെലവില്‍ ഒരു വര്‍ഷം മുമ്പ് പുതിയ വീട് മോഹന്‍ലാല്‍ പണിതിരുന്നു. ഭാര്യ സുചിത്രയുടെ ആഗ്രഹപ്രകാരമായിരുന്നു അത്.
കൊച്ചിയിലെ വീട്ടില്‍ മോഹന്‍ലാലും അമ്മ ശാന്തയും മകന്‍ പ്രണവും മാത്രമാണുത്. ഭാര്യ സുചിത്ര ദുബയിലാണ്. ഇടയ്ക്കിടെ കൊച്ചിയില്‍ വരും. അല്ലെങ്കില്‍ താരം അവിടേക്ക് പോകും. മകള്‍ വിസ്മയ ആസ്ത്രേലിയയില്‍ പഠിക്കുകയാണ്. തിരുവനന്തപുരം മുടവന്‍മുഗളിലെ കുടുംബവീട് അത് പോലെ സംരക്ഷിക്കുന്നുണ്ട്. അമ്മയെ കൊച്ചിയില്‍ എത്തിച്ച ശേഷം മോഹന്‍ലാല്‍ തിരുവനന്തപുരത്തെ വീട്ടിലേക്ക് വന്നിട്ടില്ല. നഗരത്തിലെത്തിയാല്‍ തിരുവല്ലത്തെ ഫല്‍റ്റിലാണ് താമസിക്കുന്നത്. ഊട്ടിയിലും താരത്തിന് വീടുണ്ട്. അവധിക്കാലം ചെലവഴിക്കാന്‍ വേണ്ടി യൂറോപ്യന്‍ മാതൃകയില്‍ നിര്‍മിച്ചതാണത്.
മുമ്പ് തിരുവനന്തപുരം കവടിയാറില്‍ മോഹന്‍ലാലിന് ഇരുനില വീടുണ്ടായിരുന്നു. സിനിമയില്‍ തിരക്കേറിയതോടെ താരം മദ്രാസിലേക്ക് ചേക്കേറി. അതോടെയാണ് കവടിയാറിലെ വീട് വിറ്റത്. കൊച്ചിയിലും ചെന്നൈയിലും വീടിന് പുറമേ ഗസ്റ്റ്ഹൗസും താരത്തിനുണ്ട്. പുരാതന വാസ്തുവിദ്യയനുസരിച്ചാണ് തേവരയിലെ വീട് പണിതത്. തടിയിലാണ് വീടിന്റെ പകുതിയും. മുമ്പ് ചെന്നൈയില്‍ ഇതുപോലൊരു വീടുണ്ടായിരുന്നു. അത് പിന്നീട് വിറ്റു. വീടിന് പുറമേ കൊച്ചിയല്‍ ഫ്‌ളാറ്റുമുണ്ട്.
